أودعك يابدرٍ ظهر له زمان وغاب = أودعك يوم أبعدت نورك عن الديره
أودعك يابدرٍ سرى والهوى ماطاب = عليه العيون الدمع جرح معابيره
أودعك لأجل الحب مع نورك الجذاب = هويته وحبيته ولا شاقني غيره
وداعتك روحي يوم جابه لك الجلاب = جلبها الغلا والحب هذي تدابيره
ترى البعد ما يمحى غلا من رماني وصاب = رماني بسهمٍ قاتلٍ يالله الخيره
ضربني ودم القلب ينزف من المضراب = وذا مكسبي زودٍ على الذعر والذيره
ألا ياعيوني والله إنك من الأسباب = كسبتن لقلبي جاهلٍ ماحسن السيره
تصبرت لين الصبر بيح خفاي وذاب = عليكم من الله راعوا الحق والجيره
قضى العمر منكم ما حصلي فرح وإعجاب = ولا صاحلي غير التعب منك ياميره
أميرة جمال الحسن تخضع لك الأرقاب = عذاب العيون الهايمه حد أزاريره
ألا ياهلي حطوا لقلبي حجا وكتاب = إلى صار شف النفس شره طمس خيره