الله يجيبك ياالتقاعد ونرتاح= يا الله عسى فى الامر خيرٍ وخيره
النفس طابت يا عسى الهم ينزاح= من قلبي المقهور ناره سعيره
مليت أنا الروتين جيّه ومرواح= وحبوب ضغطي في المخابي ذخيره
ناخذ حقوق الخدمه منهم والأرباح =نبني لنا فلّه حلوه وكبيره
ربي بلاني بريسٍ شبه سفّاح =عنتر زمانه بس ما من بصيره
لا من زعل تقول ذا كلب نبّاح =له زوجةٍ بلشه ودائم تديره
لو تطلبه بقريد تسمع له اصياح= كنّه قطارٍ لا مشى مع صفيره
ما مر لى مسؤول مثله ولا راح= نطلب من الله ينتبدل بغيره
لاني بشكايٍ ولاني بصيّاح =يا كود أفضفض من همومٍ كثيره
زرت الأطباء وزرت عشرين جرّاح =وكل دكتورٍ آجي وستشيره
قالوا علاجك بالتقاعد وترتاح =مع أم عيالك العجيّز منيره
مع كل صبحٍ تمد يدها بتفاح= وبالوجبة الدسمه تراها خبيره
تصحى تقهويني مع الديك لا صاح= ماهي بنات اليوم تسمع شخيره
وقت الضحى أجلس مع سعود وبطّاح= ربعٍ نشامى وكلنا اهل ديره
دايم سوالفهم بها ضحك ومزاح= ما يعرفون أبداً سوالف حقيره
قالوا تزوج واترك الهم يا صاح =فى القاهره تلقى هنادى وسميره
لكن انا حرٍ ونادى بملواح =لا لوحت به أم عيالى الاميره
آجي لها بليا شعورٍ ومرتاح= مغرم هواها لو روحي أسيره
سايح بحبّه مثل زبدٍ اليا ساح= منسى ماضيها فى الليالى العسيره
كنّا حياةٍ كلها كفاح بكفاح= تستاهل الحب هى تراها جديره
مالى حبيبٍ غيرها اليوم يا بداح= والعين عن شوفة سواها ضريره
الحظ معها لا تقولون لى طاح= والعين عن شوفة سواها ضريره
يا الله تجيب السعد كله والأفراح= نطلب رضا الرحمن ومعْه الستيره