مداوي الحرف ..

مشعل الحريّص



مشعل الحريّص (مداوي الحرف) أحد أبناء عنيزة وشعرائها المعروفين ..

ولد بالفروانية بالكويت في 25/7/1972م , وتلقى تعليمه العام في عنيزة

ويحمل شهادة (البكالوريوس) تخصص (تاريخ) ,

ويعمل حاليا معلما في مدرسة (علباء) التابعة لتعليم عنيزة

نشرت اول قصيدة له في مجلة الرياضة والشباب عام 1414

ونشر له ثلاث قصائد في مجلة (فواصل) أولاها كانت عام 1415

له قصيدة في د يوان (أحلى كلام ) لكبار شعراء الخليج

وله حضور في الساحة الصحافية فكتب مقالات على مدى اربع سنوات في جريدة الجزيرة

ومعظمها مقالات ساخرة عن الساحة الشعبية .. كما نشرت له قصائد عدة في جريدة الجزيرة

أقيمت له عدد من الأمسيات في عنيزة وخارجها في الزواجات وغيرها

وله مشاركة فاعلة في سياحي عنيزة 1427 , إذ قدّم وعلى مدار ثلاثة أيام متواصلة

( برنامج الساحة الشعبية )

شاعر عذب .. كتب الشعر في جميع المجالات , وله قصائد حلوة في الغزل

وله أسلوب خاص في معالجة معاني القصيدة , وقدرة فائقة على وصف

ما يثير الروح ويحلق بها من أزياء المرأة التي تتفاوت النساء في التجمل والجمال بها

وأبو مشاعل يملك ـ كذلك ـ قدرة على الإثارة في اختيار عناوين قصائده ومواضيعها كذلك

ولم يقتصر شعره على الغزل , بل له قصائد في كافة المجالات

واشتهر بلقبه الذي عنونّا به الموضوع وهو (مداوي الحرف)

رسمت الهـدف قـدام والعـزم مايحتـاج = واخذت الحذر من قبل ماتكتـب الطاحـه
وبين الحذر والعزم .. يكفي بلاش إزعاج = وشكر الطباشيره مـن اللحيـن مساحـه
عرفت الاوادم عقب جربـت (ياحجـاج ) = فقيـر المقـام ضعيـف لوهـز مسباحـه
وانا شرهتي تضفي على رحلة الميـراج = على اللي ركب واللي مع الجـو ملاحـه
تعـذرت وادور لهـم فالفضـا مخـراج = من طريف ماحصلـت واليـوم فالباحـه
ولا انادي الحجاج فـي زحمـة الحجـاج = عن الوضع مايحتاج لي شـرح شراحـه
اعاني من الارسال فـي ديـرة الابـراج = وفي ديرة الاعمال اعانـي مـن الراحـه
معي مثل مامعهم ودوني حجـر وسيـاج = اجوب الصحاري والعرب داخل الواحـه
كشفت السوالف وانقلوها بـدون إحـراج= وللبحـر تنيـنـه وللنـهـر تمسـاحـه
و كان العدد حجه فأنـا خاطـري هـداج = وللصـدق ميعـادً وللـمـزح مـزاحـه
وسعر الذهـب ماهزتـه طفـرة الانتـاج = تموت الاوادم والذهـب يجنـي ارباحـه
عليّه بنات الفكـر والمخـرج الاخـراج = وفلم المشاعـر يتعـب النقـد والساحـه
ولا ابغى الفلاش وسلمو لي على المونتاج = وزيف الصور مخدوم والنفـس مرتاحـه
اسوق القدم لوتعتـرض هرجـة الهـراج = ووسط الطريق اشوف اثاثيـه ومراحـه
عقالي على المرزام والراس كلّـه تـاج = وعيني على المليون ياشاطـي الراحـه

سلام الله على الساحة سلام الله علـى الجمهـور=سلامً من صميـم القلـب والنيـه علـى النيـه
بعد ماجيت في وسط السرا وامشي بحسب الدور=قدمنـي قصيـدي مانبـي رشـوة وبرقـيـه
وانا ماجيت ادغدغ في مشاعر ناصر ومنصور=ولاهي وسط قاموسي من الواحد الى الميه
على وضح النقا والقلب طاهـر والنوايـا نـور=واحاول مااجزي السيه ليـا اضطريـت بالسيـه
طبيعه ما ابحث الخافي واخل الطابق المستـور=واخبر الداب وشجرته ولا اجهـل لدغـة الحيـه
ولا عندي وماعندي على الزله سـوى مشكـور=ولاهي حركـت شعـره عشـان تحـرك يديـه
مادام إن العلم رفرف فانا مع وجهـة الطابـور=جنوبـيـه جنوبـيـه شمالـيـه شمـالـيـه
اعشق الشعر من صغري واحب الشاعر المشهور=ولا اهضم في حقوق النـاس والاوراق مطويـه
ولا يعجبنـي الاعـلام فالساحـة ولا الدستـور=عـزاي ان القصايـد بيـن مسموعـه ومقريـه
عزايه يوم اغنـي واتغـزل فالعيـون الحـور=لاشاب القاف في ذيه وسمت القـاف فـي ذيـه
اهوبل لا ارتكى رمشه على خده ماهـو مجبـور=واقول ارفق عليه شـوي حتـى يرفـق شويـه
يشوش القلب لامنه طرالـي والحشـا مسبـور=اخل الواقـع لناسـه واعيـش احـلام ورديـه
تغلغل في ضميري وانتشر في قلبـي المعـذور=وينبض بالغلا صدري مـن الطيـه الـى الطيـه
على شانه تعلمت العـب المسحـوب والمشقـور=وعلى شانه وقفت اكتب مابين الشمـس والفيـه
وعلى فزعة قصيدي لا لفاني قلـت لـه ماجـور=اغني لاطفشت من الزعـل ( يابنـت مرعيـه )

ــــــــــــــــ