هلا يامن ضوا ذيك النواحي=شعاع الشمس كنّه من جبينه
تحية قلب لاجلك ماستراحي =يبي لامالك والدنيا تهينه
علام اشفاك بالبسمه شحاحي=تغلاّ به كما لوهي ثمينه
ونا بالروح سامح لك سماحي=مضى عمري وهي عندك رهينه
تعال اتشوف خطرات الجراحي=عسى قلبك لنا ربي يلينه
ابي تبرد ظماي امن القراحي=تحل اهمومٍ بقلبي دفينه
قضا صبري وقرّب لي رواحي=وروحك عن دوا روحي مهينه
سهير الليل كلّه للصباحي=وكل الناس غيري نايمينه
الا يازين ويني وارتياحي=وصدك حايلٍ بيني وبينه
حرمت العين شوفك والمراحي=ولامن ذنب حنّا فاعلينه
هني اللّي سكن ذيك الضواحي=يريح البال لاشافك بعينه
ونا عزّي لمن هو في مطاحي=حداه الوقت للّي مايعينه
عسى الله يامر ابهب الرياحي=وتفرح بالوصل روحٍ حزينه