باح الغرام وهلّت العين همّالي = عيني تهل ادموعها كدر وزلالي
جزت عن لذيذ النوم من شدّ ما جرا = ولبٍ لجا بين المعاليق نزّالي
ولا احد بيدري ويش هي من مصيبه = والموت من بعض المصايب هو اشوالي
دنّيت من نساع الازوار عانس = عوصا من الهجن المناجيب مرمالي
رعت من خشوم النير لاسواج لمره = رملاً رعت نوّار نبت الخلا الخالي
الى ما شمخ من زايد الخير نيّها = كما ضاري يسبر مقاطين حوّالي
بعد ماخذت حدّه تذكرت صاحبي = انا في رجاه وباعد الشمل باشمالي
وصلّيتها لمواصل النادر الذي = شمخ في مراقي الطول في روس الاقذالي
وتخيّرت له من فاخر الشكل غايه = الاّ ومع ذلك تخيرت مرسالي
ومن جانب الفيحا شريق تقلّلت = كما الكوكب اللي جايب الخدّ من عالي
زعوج بممشاها جزوع من العصا = تبوج الفيافي بين فدّ وزرفالي
خفيفه حذا كور ونطع وجاعد = وخرج وفرتيق مع الدوّ دلالي
الا واهنيه في ضحى يوم وجّهت = وهو في كراها ضارب فنتق خالي
راحت ونجم الجدي يطفح يمينها = وعرضتها كثح النجوم اشهب اللالي
قلت اصبري والضيق مفتاحه الفرج = ترا الله لكربات المخاليق حلالي
وراحت تلاحق عيدها السير والسرا = يلحق سبرتات لها زايل زالي
اوصيك يالمنجوب وافهم وصيتي = عن النوم ما يشفق على النوم رجالي
بعد خمس مع ثنتين مع ست واربع = عطيت المهل دوبك عليها بالامهالي
وهي في طوارف مصر لا شك كنّها = قوس حنوه اللي يجرّون الامثالي
اتحايد عن الاسواق كن اصطفاقها = فريد بدا راسه على راس ختالي
ادخل وخلخلها مع السوق وانشد = عن الضاري الضرغام محمود الافعالي
ابو علي بن ميحان زبني محمد = عريب المجاني وافي الجد والخالي
ترا فيه شارات فلاهي بغيره = الى سمع بالطرقي يحطه على البالي
يدلك عليه الذكر يا جاهلٍ به = دليلٍ محله للمطاليق مدهالي
اوصيك يالمنجوب لا عاقك النيا = الى جيت بابه فاندبه ندبة الجالي
ترا قبل ما تبرك عظاها وزورها = ابشّرك منه بضحكته والنبا الغالي
هذا وهو للطيب قد شال شيله = جميع المراجل حاشها دقّ واجلالي
ياما انفقت يمناه بالعسر والرخا = بلا وزن وزّان ولا كيل كيّالي
احلى لمن صافاه من صافي العسل = فالى لمس خشمه زام زومات الاشبالي
وهو ستر من نهده كما البيض بالوعر = عفى الله عني او كما صنع فنجالي
هنوف لكن البرق موضي جبينها = الى جت تخطـّى كنها عود سيّالي
كما غصن نبنوبٍ من البان ناعم = ليان الى هبّه نسيم الهوى مالي
عطه مني المكتوب ووصول مابه = سلامٍ وترحيبٍ عدد رمل الاسهالي
حلا من حليب الشول في هزرب الشتا = كما الذوب غاد له على الكبد سلسالي
فان كان يا طرّاش سايلك عنا = فانا بالرجا واشكي حوالي على الوالي
يدني بعيد الشمل بيني وبينه = على خير قدم الموت قصّاف الآجالي
انا كل ما يطري رفيقي محمد = اجاوب خلوج ليلها تهجل اهجالي
غذا ضيرها مع ضاعنين ترحّلوا = تجرّ الحنين من الوله تعول اعوالي
انا كيف ابنسى من صفالي على النقا = رفيق حشا ما قال ذا لك وهذا لي
اجازي هل المعروف مني بمثله = وهو لو جفاني كل ساعه يوراّ لي
انا ماحسب ان الولف مثلي يقيسه = فلا شك له عندي محلّ ومنزالي
فلاكن نحان البحر والبعد والنيا = سكن دار لا درّت على الدار الاثعالي
تخيّر عن الفيحا جوانب مدينه = اكابر دمشق إلها يدقّون الاتيالي
فيا غافر الزلات يا سامك العلا = يا مخرج ذا النون من بحر الاهوالي
ويا عاقل يوسف على ابوه بد ما = هوى في غباب الجبّ وبه الوحل حالي
ترد لي اللي تنحت ركايبه = على العزّ والناموس يرجع بالاقبالي
انا حالف لاذبح من البوش حايل = الى قيل لي صاحبك هنيّا الا اوّالي
فالى قلت ابصبر واطرد الهم بالنجم = باح الغرام وهلّت العين همالي
وبعد منتهى قيلي صلاتي على النبي = عدد ما وطى البيدا من اول الى التالي
وآله وصحبه عدّ ما سار باليرا = او ما اختلف نبت الزهر عقب الامحالي