ويلاه من دنيا بها مالنا حظ=ياما حَدَتْنا للغرابيل والضيق
لاجيت اعدّل مايله طاح وانقض=تروح غربٍ عقب ماهي بتشريق
الى غرست العود وارويت وابرض=سمّه نصيبي عقب ريٍّ وتعريق
واكْبَرْ عذابي من بدالي تعوّض =ماصار عنده تالي الوقت تفريق
ياوالي القدره عن القلب تنهض=همٍّ يجيبه جيب لولا المعاليق
على حبيبٍ جنّب الدار واعرض=عقب الوفاء لي والغلا والمواثيق
ياهل الهوى واجد من الناس يمرض=ويلقى دوا ه وداه من عقب تدقيق
مير الهوى ماهوب يبرى وينقض=شيٍّ يحوم القلب حوم المطافيق
ياليت مشكلتي على الزين تعرض=ويْجاب رده لاقراها بتبريق
لعلّها عقب الغرابيل تنفض=ينفل ديباج الغلا عقب تطريق
من شان حالٍ سلّه الحب تقرض=تمشي طريق الموت ماله تلاحيق
يازين ذا علمي رجاء لاتريّض=علمٍ غنيٍّ عن شهاده وتصديق
عجّل على قلبٍ بهجرك تفرّض=وانظر بعينك ياعذاب العشاشيق
تفهم بنفسك كيف حبك تورّض=قلبٍ عطاك امن الغلا فوق ماطيق
ماقول غير اني طريحٍ امعرّض=وانت السبب يامِيْبِسْ الكبد والريق