للشعر بيبانٍ كثيره ولِه ساس=مواهبٍ من عند ربي عديدِه
الشعر مايَلْبَس على كِل لَبَّاس=ماكل ماسِطِّر يسَمَّى قصيدِه
مايِنْصِرِف شعرٍ على بَنْك الاِفْلاس=لاصار مايمكن يغَطِّي رصيدِه
الشعر لِه معنى ولِه لَفْظ وِاحْسَاس=مايِدْرِكِه من لـَمَّعَتْه الجريدِه
اللِّي يقول ويَحْسِبِ انِّه طَلَع راس=لَكِنْ على ماقِيل تسمع رِعيدِه
يِقولَ انَا شاعر وَانَا اقُول لاباس=عَطْنا منَ المفهوم جُمْله مُفيدِه
كِنِّه يِجِيه الوَحْيْ من بِدِّةَ النَّاس=وِالاَّ تِقِل مفتاحَ الاَشْعَار بِيدِه
وِان جِبْت لِه بِيتين بالحيل يِنْحاس=يَرْجِي تِجِيهَ السَّارِحات البِعيدِه
تَمْضي علِيهَ اشْهُر بِهَمٍّ وْهُوجاس=زُولِك يْوَرِّيهَ العذاب اويِزيدِه
والنار ماتَشْفيك من غير مِقْباس=ياللِّي بِديت العلم وِالاَّ تِعيدِه
هذا وَانَا ماحِطّ للشعر تِرْباس=كِلٍّ ابْفِكْرِه يَنْهَجَ اللِّي يِريدِه