ياهل الفاطر اللي فوقها من كل دشن جديد غالي = سلموا لي عليه الى لفيتوا صاحبي ياهل المامونه
عاش من ناشني من عشرته هملول صيف حقوق يالي = ربعّت منه وديان الضماير واستتمّت وهي مصيونه
عين شيهانة تطلب علفها وكرها في رفيع الجالي = ما بذرت الجميل الا وانا يوم بذره عارف ماعونه
يا وجودي على ما فات لي هيهات يوم ان الشراب ازلالي = يوم عيني على طرد المها وملاقفه بالهوى مفتونه
وانشدوا نور عيني عن حواله واشرحوا له سراير حالي = هو منون عليّ بحاجتي والى هرج فاكتبوا مضمونه
كان هو مقبل لي لو نحيت بعيد مانيب دوه سالي = وان نساني وصد وسجّ مع غيري قويت العزا من دونه
خاين كدّر ما صفا فيما مضى جمّل الله حالي = صابر صبر ملهود الجمل والنفس في وليته مرهونه
كل من لا يصانع بالجميل حمار لو كان اصيل عالي = مثل من لا يبرّ بوالديه ويقطع السنّه المسنونه
هبّ يا حظّي اللي بعّد الغالي وحطّ البغيض قبالي = والنصيب الردي ما يدرك الدانه الغلطانه المصيونه
كل ما جيت ابنها القلب عمّا فات عيني قليلة والي = تعترضها صواديف الزمان وتبتليها وهي مجنونه
والله اللي نعبده خالقي ما شفت انا ما يجرح الرجّالي = غير حسّة صديق داخليه والمخاليق ما يوحونه
عدل والله يحب العدل واللي ما يحبه ضميره خالي = مثل من لا يعرف البا من التا والعرب خطّهم يقرونه

يا سلامي على اللي غايته ومناه ينقض على الفتّالي = عد ماهب نسناس النسيم وطوّح الراعبي بلحونه
يا سليمان نقّضت الجروح الخافيه منك واعزالي = صرت مثل الحيا للقلب علّيته الى ما استقن غصونه
تذكر اللي كما عنق الفريد الى تذّير من الختّالي = فيه من مبسم الادمي وسلبت عاتقه والعيون عيونه
ما قويت العزا والصبر يوم انك عرضت الغزال قبالي = ويش عذري من الله يوم اخلّيها وانا بندقي مشحونه
درت مسلوبة من فوق متني كنّها شوكة السيّالي = ملحها قاحل نقريز ما تخطي الضريبه وهي مامونه
مع تكميل ندبها شوف عيني يوم ثار الدخن وانجالي = لا اشقر الدم يوم انه كثح من منشب الغاتره بمتونه
هجّ صيد الخلا مقفي والاول ما يلد النظر للتالي = يوم عرجد فتيخ واسبقه مثل المغاليب روس قرونه
آه يامن سبى عقلي بمزموم كما صنعة الفنجالي = بالنهد والنحر والمفرع اللي منه سحر الهوى يجنونه
صاحبي غاضني والغيض ما يصبر على ضيمه الرجالي = اشهد انه كليف بحال والا حال ضيم الهوى ياهونه
منوتي دانة غلطانة ما وقّفت في يد الدّلالي = بنت خمسة عشر واللي شراها ما تحسّف على مليونه
خابر في زمان فات لي مقرٍ مصدٍ عذي ازلالي = خذت لي مقدار خمس الحجج وانا آرده والدعابيل ما يردونه