قالوا تداوى قلت مابي خلافي = بي علة يبحل به اللي عرفها
ان ما شفان الله فلا احدٍ بشافي = واضامري ما يبرد الماء لهفها
طعمي على كبدي وشربي عيافي = ما تقبل النفس العزيزه عذفها
يالعين حبك للهوى من تلافي = والحب يدني للمهايم تلفها
حن البهايم للبهايم ولافي = وانتي ولفتي واحد ما ولفها
يا ما على قلبي من الضيم هافي = وناظري دمع العشيه ذرفها
عليك يا خل مع الناس خافي = بيني وبينه حاجة ما صرفها
ما هوب معطيني ولاهوب نافي = ومن البطا ظنيت شي صدفها
واثره يمنيني ولاهوب وافي = ماهوب مخلوق يداري شرفها
لي حاجة حول الثمان الرهافي = لولا ان نفسي لينه ما عطفها
بين الجبين وبين مز الاشافي = نظم من اللولو بغر كشفها
العين عين اللي تنهض وشافي = ما طالعت عينه بكفه حذفها
ومجدل من فوق الامتان ضافي = شقر على حد الردايف عسفها
كن النحر جمرٍ من الكير صافي = طيّر رماده والغثابر نذفها
ومزبرات فوق صدره نظافي = حمر الثمر مزع ثيابه طرفها
حمر الثمر كنه فرايد رعافي = لاواهني اللي بكفه قطفها
عبث لطيف الروح والوسط هافي = سقم الصحيح وعلة اللي وصفها
والردف كنه ذالق عقب سافي = ما صعفقت ريح الهبايب لقفها
هني قلب دالهٍ ومتعافي = ما صكته بقعا ولا قيل شفها
ما ولعنّه لابسات الغدافي = بيض الخدود اللي ضميري هدفها
صلوا على المعصوم ما طاف حافي = عد الرمال ومنتهض من شعفها