الف والفت التعفف والكفاف = هاينٍ نفسي وعاسفها عساف
ما لقيت اعز من قصر القدم = ما عدا الواجب مثل فرض الصلاة
با بلا شك ان كلٍ له نصيب = يدّرج له من بعيد ومن قريب
ما عن المكتوب فر راس القلم = خير والاّ شر الى دبّر فوات
تا تخير بالمجالس لا بديت = وانطح الواجب الا منك بليت
والقصور اللي يعد من العدم = ما على راعيه لو قصر شنات
ثا ثرى المحروم من حظ الوريث = والتجاره ما يغطيها النبيث
كن راعيها على راسه علم = الدراهم لو تخفىّ بينات
جيم جسر المرجله طلق الحجاج = والمروّه تتضح مثل السراج
والحيا ساس الشجاعه والكرم = والقناعه باليسير اصل الغناة
حا حلالك لا تفرط به يروح = بالملاهي لا ولا تذكر شحوح
ما يفك المشكله رجل عسم = كان لك شفٍ بحل المشكلات
خا يخيّل للذهين انك دريخ = ما درا ان الناس بالفطره بنيخ
والصداقه كان شاركها الوهم = شوّشت لو بالقلوب مصفّيات
دال دفع النقص جا من باب زود = وانقطع حبل الوفا وهو معقود
يوم تليناه بالفعل انصرم = تقل مجسومٍ مع النصف بحصات
ذال ذكر الله على المسلم لذيذ = والتعوذ به وهو نعم المعيذ
واحد فرد صمد خصم حكم = منصف الجمّا من ام امحوربات
را رفيت من الغلط شي كثير = تقل ما ادري تقل ما عندي ضمير
والذي فضل صلاة بالحرم = اني اكثر ما فعلت مجاملات
زا زهر زاهي ولكن ما يفوز = مادري يصلح يجوز او ما يجوز
الفنون طيور والناقد سهم = والبنادق للطيور مفهقات
سين سجل يالجليس من الجليس = والربوع يعد قدام الخميس
ما على هاذي وذيك الا الشحم = انسحاب ما وراه مناورات
شين شور اللي بشوره ما يبيش = ابذر الطيّب ترا الطيب يعيش
واردع النفس ان تمطّاه الزّرم = لا تقول القذف اخير من السكات
صاد صوت للعموم وللخصوص = فيه ما يروي السموع من النصوص
واللبيب اللي الى فِهمّ فِهِمْ = يدري ان ايديه شتان واخوات
ضاد ضدك لابسٍ لك ثوب غيظ = ان حضرت او غبت بعيونه بغيض
وان لقى بك عند ما يقدر مهم = ما تريّح لين يجدعك بهبات
طا طرى الطاري على العزم النشيط = اني افصّل بها المعنى واخيط
والجواب الهزل ما يطرد قرم = كان ما جن البيوت مجوهرات
ظا ظهر لي بالحياة ان الحظوظ = خيل ذا طيب وذا غوج ربوض
الاصيل الى عدى والا انهزم = فاز والثاني عضوده فاترات
عين عوّد يا عيوني لا تضيع = وانت في رايك تطيع او ما تطيع
كان ما وفقت توفيق اجم = فالعمل طب تطيب به الحياة
غا غرور النفس من مخ الدماغ = ما على راع الجواب الا البلاغ
ما عليّ ارطن على الناس العجم = جل من فرق على الخلق اللغات
فا فوايد مير وين اللي يشوف = هالسرور اللي حدر وضع الحروف
امس مرّ وراح ما كنه خطم = وانت حيٍ اليوم لكن كم مات ؟
قاف قِفْ والجار شرهن بالحقوق = يشتهي منك المروفه والرفوق
صر لعار الجار مثل المحترم = واعرف لن الجار له حقٍ ثبات
كا كرمك ان كان هو لامك وابوك = فانت طيّب ما ورا طيبك شكوك
وان كلوك الناس فابشر بالندم = راح عمرك من شناة في شمات
لا لو انك لابس تاج الكمال = وانت ما عندك الى سولفت مال
فانت باحسن ما تسولف متهم = لو تقول كميت هو شاهد مرات
ميم مدح النفس يِلحقك الملام = وانت فعلك واضح ببلا كلام
لو تقول اسبق على الرجل البكم = وانت صادق كد نشر بمجلدات
نون نذكر عقب ميم ولام ونون = يا مسولف ناظر اللي يضحكون
لا تحسب اللي تهرّجهم غنم = كم ذيب مخمرٍ في جلد شاة
واو ول بعيد واقرب لك لوى = ما يصف الصين والمعدن سوى
كان عندك كل شي له طعم = فانت راع افكار لكن عازبات
ها هني اللي مطيعٍ الاله = رادعٍ شيطان نفسه عن هواه
المعاصي هي سبب زيل النعم = وانت واعمالك عليك مسجلات
يا يعين الصابرين بكل شي = واحد يفني وهو ما زال حي
ثم صلوا عد ما يذري النسم = للنبي اللي طروقه واضحات