وجودي وجوداللي جذب ونته واشتان=بعدماوقع وافلت من ايدينه الطاره
قلب موتره بالقيظ في حومة النقيان=صميله وهو ظامي على الباب مطاره
فزع للهمل بالقايله والقدم حفيان=تعب وانقلب يبكي على شوف سياره
عرض له حلال القوم طفق من القعدان=جفل ساع شافه يوم حظه طفت ناره
يبي نقذة للعود والعجز والورعان=يدير الروابع والهواجيس محتاره
قعد بالخلا لامن صميل ولاحذيان=صفق بيده اليمنى من الوجد بيساره
ضرب ركعتين وسلم امره الى الرحمن=كفى يامكافي والمقادير جباره
بعد مانصرم نصف الشهر جابوا الرعيان=خبر ميت بين الطعاميس والقاره
لقوا جثته ثم اشعروا بالخبر سلمان=وقال ابعثوا يكشف على النفد طياره
انا صابني مثله من الهاتك الفتان=طلبته بصلح وشنها امس الضحى غاره
انا وش حياتي كان ابصبر على ماجان=معك حق تلعب لعبة الفرد بالشاره
زماني وانا اراعيك عن جملة الخلان=وافوضك تاخذ جوهر القلب واسراره
عسى ربما ترحم وتعطف على الوجعان=على راحتك تسمح من الورد نواره
اطفي فؤاد تشتعل جوفه النيران=ولو حبة بين العشاريق وزراره
احللك وادعي لك من الخالق الغفران=الى انقذت روحي من شقى الحب واكداره