لا باس يا عين ٍ على السهر حدها = ليالٍ كموتٍ ما تخبر بسدها
الى صفت ساعة زمان على الهوى = لابد ما تاخذ على الطول ضدها
سريعة الاقفا الى منه ادبرت = وِنِيٍ على من كد جذت به مردها
عطوف الى حنت عصوف الى اجنفت = ولا كل من شدّ الحزابه يشدها
اقوله وانا كد ذقت جرعات غلها = امورٍ تشيّب راس من يستعدها
من ضمنهن غلي وغيظي بغربتي = احاتي فتوقٍ همتي ما تسدها
وانا جالبٍ نفسي للاسباب كلها = اقع مشكلات مذهبي ما يودها
ولا راغبٍ فيها ولا غابطٍ بها = ولا هيب ثوبٍ لي ولا نيب قدها
وهي نومست ناس علينا وشاهدوا = من العز حفلات عدا الطور حدها
عدونا وعادونا وهم يبخصوننا = كما يبخص الحبّاب صاعه ومدها
فلو تحكم الايام بالعدل بيننا = نجحنا ومن يمناه طلقه يمدها
فلا كان كاتفنا زمان فضايله = نفسٍ يهيّدها ونفسٍ يهدها
ولا خضت هالموضوع من شان عيشتي = الارزاق غرسه والتسبب يجدها
ما دام بي عرقٍ على الصح يحترك = فالعافيه ترفي خلل من يكدها
فلا شك ابا وصيّك يا ملفت النظر = الى خفت من دعوى تجاسر وبدها
ولا شفت من ربعك ملل لا ترومهم = اقلط على عقدة غلاهم وهدها
ولا قابلوك بصح بالنصح لاقهم = ولا قيل ذي حروة رضاهم تعدها
ترا لك شروط ومنك للناس مثلها = مباديٍ شرع المكارم يقدها
ولا يجهل المشروع من جد واجتهد = سوى من قضب حبل الخياره وصدها
ترا ذاك الى منه هرج لا تلد له = مثل سلعةٍ عذروبها اللي يردها
تمت وصلى الله على سيد الملا = ما هل واهمل رايحٍ فوق خدها
والآل والاصحاب ما قلت باوله = لا باس يا عين على السهر حدها