يا زين هالوقفه اللي تقعد الراس = لولاي انا ودي ابعد عن مكاني
وان لزمن العلم يا شليويح لا باس = ما من خسارات هرج باللساني

نبا الروابع تصير اخماس واسداس = من باع بالعشر يربح له ثماني
الشايب اللي يتلـّه كل هوجاس = يصوم شعبان قدام رمضاني

ياللي بكل البحور الظلم غطاس = صيـّور منـّه يوريك الزماني
بعض الطواريق يا شليويح رماس = خل المعاني قويات سماني

مانيب زعلان شيٍ واطي الناس = لا شك ابلعب لابد العمر فاني
الكيف مرّه وغير الشاهي الكاس = علـّم برغبتك يا هالمودماني

الوجد وجدي على منقوش الالعاس = عليه انا صرت مثل البهلواني
بغيت ازوره ودون الباب حراس = كم واحد كد وطاه اللي وطاني

دور سنينك وفصل كور عرماس = وبالك تشّره بعود الخيرزاني
دور هنوف تحني مقدم الراس = من خوف لونه يشاهد لون ثاني

ما من بعايد وانا واياك الاجناس = ان كان يقراك ذا الكارد قراني
هذي علومي تخلي الفكر ينحاس = تدري بها يا شليويح الذهاني

ماني سواتك ضروسي تضرس اضراس = والا انت طاحت ضروسك من زماني
هذي شفاياك عقب القيظ يباس = شيبت ما ذقت حب البرتكاني

العلم الى جا يدق الفاس بالفاس = والفيش بالفيش والعلم البياني
ترا الاميلس عليه يقيـّل الحاس = والا الحرش مثل هدّاة الحصاني

العود فضه ولكن عوده نحاس = يدق سلفه ولا به كهرباني
يبي يبرد بها من عقب الافلاس = لا شك ما تنفعه كثر التماني

ما ادري صنت ويش قال الولد مرداس = يوم انها قارنت عند القراني
التـّبرقه تـدّرج من غير منخاس = ومضيعين الحفيظه بالضماني

النور في موتره ما فيه كباس = والريع مقصود يا رخو الاذاني
الباتري خاليه كله من الماس = والا المكينه تهرب بالدهاني

شاطر الى شفت لك حوّا وبسباس = منتب بفيد العنب والزعفراني
عصير رمان مشروبك منه كاس = هالحين واللي مضى هاك الزماني