شعراء عنيزة - محاورة عزيز البادي وحمد المغيولي

هــنـــــــا ,,

طــرق بين حمد المغيولي وعبدالعزيز البادي ( رحمهم الله ) ...

حمد

التفت من جنوب وشرق وادرج عيوني = عاش مـــن بـــــادر الحضار بالشاذليه
حسبي الله على اللـــي بالخلا جشموني = ليتني مــا دريت عصير والشمس حيه

عبدالعزيز

يوم تقصد على التالي بتالي الظعوني = ما حضرت المجال اللي حصل من عشيه
والله انــــي مـــا غط النور لو يجحدوني = لابـــــة يشهـــدون وشايفيــــن القضيه

حمد

الليالـــــي كفــــا الله يخلفـــن الظنـــوني = والله انــــي عصيـــر مكلـــــف المطيه
يـا قمر عشر وشرق والعرب يشهدوني = سوق نورك معــــي فالليله الخرمسيه

عبدالعزيز

خابــــر مـــا منعك الا كثيـــر الشطوني = مير ودك علـــى مـــــا قـال تكمي عليه
والله اني من المغرب على راس شوني = في رجا اللي من العاده يساعف خويه

حمد

حال راس الشفا والضلـــع دونك ودوني = ادفع الرجل والرجلين مــــا هي جريه
انت ياللــــي من المغرب تجـــر اللحوني = ساقك الشوق والمشتاق يلقـــى هويه

عبدالعزيز

خابــــر انــــه حضـر للنايبـــات الزبوني = مــــا نلومك بها والله عليــــــم الخفيه
يــــوم جريت صوتـي بالمجال احرجوني = قبلها كنت ابسري مـا ارغب الدودحيه

حمد

احمد الله زمــــان فــات موفــــي ديوني = مــــا تعذر ليا جـــــا العلم لدنـــــى دنيه
لا تجــر الســــــوالف يصبح العلم دوني = خلها بـيـنـنــــــا تنقــــاد هـــــرجه قويه

عبدالعزيز

لا تكلف تـــــرا الدعـــوى بهونه تهوني = الليالــــــي سهــــود ولا علينــــا دعيه
مـــا بعد نشت متـنــك في نواجذ سنوني = لا تكلف تـــــــرا بعض السوالف غبيه

حمد

لــــو تكلفـــت راســـي ينقلنــــــه متوني = عارفين الــــرباع وعــــــارفين الثنيه
ودي العب مـــا دام ان الثمر بالغصوني = من ضرا بالجزايل مــــا التفت للرديه

عبدالعزيز

مـــا نـريد الوشـــــاة وجنسهم يفرحوني = ضارب لـــــي بنيه وانت عنـــــي بنيه
كان ودك تهجرس يــــا رفيـــع الركوني = التميمــــه نجازيها بذبـــــــح الضحيه

حمد

ما يشوش علـى الرجال طــق الشنوني = ريـّـــــح البال والعب والنفوس اريحيه
كثــرة اللــــوم للشاعر تزيـــــد الغبوني = وانت رجــل تعرف الهرجــــــه القلبيه

عبدالعزيز

واجد اللـــــي لغرات العــــرب يبحثوني = لا جــزا الله بنــــــــو الخير راع الرديه
وادري انك علـــى كل السوالف تموني = راضي مــــــــــــا تقول ولا بقولك زريه