يالله طلبتك تزيل الهم يالوالي=وتردّ لي غاليٍ طالت مشاويره
ياكودي أفرح وأطيب وينشرح بالي=وأعوض اللي مضى لي باول السيره
(أشوف واسمع ولاني <مصدقٍ> حالي=شيٍّ يخلي كبير العقل في حيره)
إلى اقبل الليل زاد الليل غربالي=تكثر هواجيس قلبٍ صعب تفسيره
تلوفني لوفة المجروح من عالي=واغيب من شدّ لوفاته واعاصيره
واشوف موتي يزاول لي ويبرى لي=واخايله بين تهليله وتكبيره
ياصاحبي ياربيع القلب عزالي=من روحتك والهوى بي مشتعل غيره
(فرقاك ضيقة وهم وغم واهوالي=ياكامل الوصف<عجّل شرّف الديره>)
متمكّنٍ بي هواك ومخلف احوالي=طيفك يزورن بلا فيزه وتأشيره
وسط الحشا لك مداهيلٍ ومنزالي=والشوق لك دايمٍ تصدح عصافيره
ماغير أطالع برقمك وسط جوالي=كنه خيالك إلى جتني تباشيره
أنت الحبيب الحبيب .. الغالي الغالي=يا منبع الحب يا أحلى تعابيره!
لو تجمع الحب من سالف ومن تالي=ما يستوي ربع حبي لك أو عشيره
ماهمني لو جميع الكون يصفى لي=ولا همني بالهوى حصة أو منيره
أبيع عمري واشوفك مرة قبالي=ليتك تكرّم وتسعدني بتسييره
أملا النظر منك واطفي واهج الصالي=وابرد غصون تكوّت من مخاطيره
ياروح روحي تلطّف حقق آمالي=واعطف على خاطر كثرت مخاسيره
وإلا فعجّل وقطّع باقي أوصالي=دنياي من غير حبك ما بها خيره