من مداعبات الأصدقاء

هذه قصيدة وجهتها للزميل والصديق (المشتاق)

ذات مداعبة تواصل


ما كل قلب لا نثرته جمعته !!

كسرت يالمشتاق رجلي مع الساق=الله حسيبك كيف رجلي كسرته!
وشويت قلبي في براكين الأشواق=وحرثت جرحٍ بالضماير دفنته
وجرّعتني مُرٍّ وعلقم وغسّاق=ودمي على ذكر الحبايب نثرته
ذكرتني دمع وتجاريح وفراق=وعذاب وهموم وتهاويل شفته
رجّعتني من عقب ما خاطري راق=لدربٍ حسبت إني دلهت وتركته
ليتك سكتت ولاتناوشت الأعماق=ما كل قلبٍ لا نثرته جمعته!
جرح القلوب يزيد طاق على طاق=لو هو بعد مدة إلى من فتحته
واللعب بأوتار المعاليق حرّاق=وأوتار جرحي يالسنافي عزفته!
ترى الهوى لقلوب الأحباب سراق=يسرقك وأنت اللي تحسبك سرقته
ترى الهوى يوجع إلى حد الإزهاق=ونار الهوى تصهرك ليمن شعلته
يقوله اللي جرّب العشق واشتاق=وضيّع بدرب الحب صيته وسمته
يالله طلبتك تجلي الليل باشراق=وتنسيني أيامٍ بها الروح عفته
ومن لامني .. باكر إلى صار عشّاق=يبي يعيش اللي على الضيم عشته!
عرفت يالمشتاق ياعدم الأخلاق=وشلون يالمقرود رجلي كسرته!!