بغير الشام نفسي ما تطيبي=وكيف اللي يبي جوّ الرطوبه
يروح لغايته ماله طليبي=على مقصوده خْطاه محسوبه
وأنا باصبر لما صبري يثيبي=مرادي غير والنفس محجوبه
على منهو من الدنيا حبيبي=تعذّرت الدروب إلا دروبه
عسى الله منه ما يقطع نصيبي=حبيبٍ غايته شوف مْحَبوبه
أسلّي خاطري والله رقيبي=بقلبي له مثل حر الشبوبه
ألا ياجرح قلبي وتعذيبي=عليهم عدّ ما قلبي رعوا به
سميّات الظبا برد اللهيبي=يهولك زينهن في كل نوبه
حلايا الحور بالزين العجيبي=وهبّات النسايم بالعذوبه
إلى هلّت على العين السبيبي=وغطّا باقي القذلة جنوبه
ولدّت عينها مثل النديبي=حلفت إنه على نفسي عقوبه !
قضيت ورحت لعيونه نهيبي=وضاع الراي مدري وين هو به
أنا خلّيت زينه شق جيبي=وهو خلاه ملبوسه وثوبه
تكمّل بالحلا عن كل عيبي=يذرّ الزين فوقه مع هبوبه
ألا ياويل من عقله ذهيبي=غدا من نظرة العين اللعوبه
جداي الوجد من طول المغيبي=أبي شوفه وأنا مانيب صوبه
هنيّ اللي على حدّه قريبي=ولا نفسه على البعد مغصوبه
تراي أصبر وأنا جرحي عطيبي=أشوف النقص والروح مْعَطوبه
وأظن اللي سواتي ما يطيبي=ولا ينلام لو هم ما شقوا به