يانور عيني لو عن العين صديت=لا تحسب إنك غايبٍ عن خيالي
لك صورةٍ ما هيب تقفي إلى أقفيت=معها تعيش الروح طول الليالي
ما تدري إنك بي على القلب خطّيت=اسمك ورسمك بالحروف الطوالي
ولعتني وأقفيت يوم إني أشفيت=وشلون عاد أنساك يا هُمّلالي
لو الغلا يمحا إلى منّك أبطيت=ما شفت مكنون الغلا هدّ حالي
ياما وياما لك شفقت وتمنيت=وأفرح إلى هبّ الهوى من شمالي
ليتك إلى منّ الهوى هبّ هبّيت=وألقاك يا عطر النسايم قبالي
لو جيّتي لك في يدي ما توانيت=وأجي لك أسرع من بروق الخيالي
مير الزمان اللي حدا عنك وأزريت=عيّا نصيبي والزمان ارتكى لي
يا طول ما يمّك عن الخلق سجّيت=وأغديت مشواري ولو هو عدالي
كنّي معك ما رحت ساعة ولا جيت=لا شك يوم أصحى وإلى إني لحالي
وياما علشانك للأيام عدّيت=كنّي رقيبٍ للشهر والهلالي
وأنت القمر لا من لعيني تجلّيت=تبدّلت حال الشقا بالهنا لي
من يمّك الخاطر وعن غيرك أغضيت=عيّت تطيق النفس عدل وميالي
روحي تبيك ويمك الصوت صبّيت=وين أنت جاوبني ورِدّ الرجا لي
عز الله إني في غرامك تعنّيت=يا علّ يجري لك مثل ما جرى لي