وهذه قصيدة ألقيت في الأمسية التي أحياها مع بعض الشعراء ليلة ا

الأربعاء 26/1/1428هـ , في مهرجان الغضا

بديت باسم امكون الكون سبحانه=عظيم تفرد في جلاله وسلطانه
اله خلقنا واعتنى في شئوننا=وعدنا بيوم العدل والعدل ميزانه
له الحمدواله الشكر والفضل والثنا=علي ما تفضل من عطاياه واحسانه
واصلي علي سيد البرايا وسيدي=رسول الله اللي عزز الدين باركانه
شرح صدره الرحمن وانزله الهدى=ووضع عنه وزر منهك الظهر وامتانه
ورفع ذكره الطاهر يجلجل علي الملا=يردد مع التوحيد في جملة اذانه
ولا يدنسه رسم الخنازير لنهم=عيال اللقايط منتج البار والحانه
الى صار ما للكفر ذنب يعادله=فالكفر قطاع الطلايب بعنوانه
من قبلهم كفار مكه وغيرهم=ولا اهتز شعره طاهره بين حجانه
ثابت صلاة الله عليه وسلامه=يبشر وينذر ويتخضع لرحمانه
نفسي فداك ووالديني وسربتي=يااعز واشرف من حوى القاع جثمانه
ومن بعدها يامرحبا في حضوركم=حضور عليه النفس شفقه وولهانه
اقولها من هاجس ما كذبها=ماهوب لا خايف ولا راجي عانه
ماغير ايتشرف في مثوله امامكم=ويطرح لكم منتوج فكره ووجدانه
هلا مرحبا ما لاح برق مع الدجى=وما يرزم الرعاد ويهل ودانه
يضفي عليكم لين يشرح صدوركم=وينثر عليكم ريح مسكه وريحانه
ويضفي لشعار الامسيه مع عريفهم=عريف حكيم يرتب الدور لاخوانه
ويضفي لمقصورات حور وزاننا=بخيام ستر يطالعن شاشة الدانه
هن نصفنا الثاني وهن كل حبنا=شقايق مناعير الحرايب وفرسانه
انكان ما خصيتهن في تحيتي =فلا عاد لي داعي ولا عاد لي خانه
ومن بعدها ياكبر لومي وشرهتي =وبه ناس غيري مستضيقه وشرهانه
علي اللي يميز هرجتي يوم اقولها=تطالعني عيونه وتسمعني اذانه
ارى المعول الهدام يهدم صروحنا=يبي زعزعة ساس المعزه وبنيانه
وهو صاقط يخسى ويقطع وينثبر=يالعنبو وجه الدويني ولحيانه
يقابلك في وجه برودة ملامحه=برودة عجينه بايته وسط عجانه
ولا ناقم منا علوم تضيرنا=ماغير الحسد من عند نفسه وشيطانه
الله عطاني واشكر الله عطيته=والله حرمه ومستحق لحرمانه
والله عدل ما يبخس الناس حقهم=ومن يعترض يجني وباله وخسرانه
تكفى يابو فيصل ترى الوضح محتدم=مايقبل التاخير ويثور بركانه
تكفى ترى تكفى الى سمعه الولد=يفز ويفسر عضوده وذرعانه
ويرمي عقاله ويتحزم وينثني=من دون ميقافه وميقاف جدانه
لا تقدم الا من يشرفك ماقفه=يغليك في قلبه ويطريك بالسانه
ولا تقدم الا من عنيزه وحبها=ينبض بمعلوقه ويجري بشريانه
حر ولد حر ينومس الى انتهض=يطلق احجاجك مخلبه قبل جنحانه
هذا الذي يستاهل المدح والثناء=ويستاهل التكريم والرفع من شانه
ماهوب خمع بس غاية مقاصده=افشال غيره يوم دعواه فشلانه
اما حمل حمله فيبشر بضربة=تنشر له السوداء علي راس عيطانه
عندي علوم ماش داعي لذكرها=لو اقولها حامت علي الجرح ذبانه
لكن ابتركها وابترك مجالها=الوقت اللزوم وكل شي له اوانه
من اعذر فقد انذر.وغيره بذمتي=ليشوف شي ما خطر له بحسبانه
حلاة الكلام يرد تاليه لأوله=بديت باسم مكوّن الكون سبحانه