لا صار ما لك فالبخـت أي مقسـوم = لا ترتجـي إفراج(دنيـا التعاسـه)
غيري أخذه وبت انا منه محـروم = ثوب ٍاخيطه وأحرمونـي لِبَاسـه
غيري حصد زرعي وانا منه معـدوم = ريقي يجف وغيري يطفح بكاسـه
وقت ٍ لجم صوتي وانا فيه مظلـوم = وفي وقتنا المظلوم يكتم اعطاسـه
ما هو رخا مني ولا هي لـي سلـوم = وماني ضعيف ٍ يشتكي قل باسـه
لاشك في بالي مواعيـد واحلـوم = ولا شك خاب اللي تعـدا مقاسـه!
والحر مثلي يكـره الـذل ويشـوم = لا ما تساوى جبهتـه مـع مداسـه
كني سهم مسنون في كف شغمـوم = صافي معادن ما أختلط مع نحاسه
يبي يوجههـا علـى قايـد القـوم = وبينه وبين الضد جنـد وحراسـه
والا كما طير ٍ تعود علـى الحـوم = طاغي وكـل ٍما يطيـق افتراسـه
أمْسَى على كف الردي راعي النوم = يكرب اسبوق الطير والريش حاسه
أصغر وراعينه يجي تالـي اليـوم = ينتف بريش الحر لعب واناسـه!!
ابوه خايب ما زهى بيـت واهـدوم = حتى عشا طيره ينقّـع بطاسـه!!
بعت الرجا للوقت وأرخصت فالسوم = والقصد واضح مايبي لـه دراسـه
دنيا عسفتني بَيّحَـت كـل مكتـوم = وأغضي بطرف ٍ ما رقد من اعماسه
ما فاد في دنياي قـوّه ولا اعـزوم = وروح التفائـل أفتقدنـا حماسـه
حتى قصور الحلم يلعي بَه البـوم = حلمي يموت وحظي اعلن افلاسـه
يجبر عزاكم ربي إن قيل مرحـوم = ويجبر عزايه في شبابي وساسـه
قولو لأبوي أني فلا مـت مذمـوم = الطيب طبع ٍ لي وعلـم وفراسـه
نسل الخوالد ما يجـي درب مثلـوم = ولا يجـي درب ٍتعـدّوه نـاسـه
قلته وانا شبراق بالحـق ملـزوم = خالي ولـد دواس والحـق فاسـه
ما أريد اشوفه طيب الفال مظيـوم = لا يذرف دموعـه ويَطْفـى اقباسـه
قولو لابوي اني عفيته عن اللـوم = اسمي مع اسمه ما تجيـه الدناسـه
واني عفيف ٍمانهج سكة ارخـوم = ولا تمـادى فـي دروب النجاسـه
لا يبكي افراقي عسا حسّـه ايـدوم = ولا يطوّح الونات و يهـز راسـه