أَنا وأَنتم ياجِماعه=هالدنيا منَّا مرتاعه
تُوحينا دايم نطريها=بين الدقيقة والساعه
إنْتِجَمَّع ونتفرَّق=قالت ذولا بي طمَّاعِه
وحَّشْناه وخافت منا=وهي من حِسنَه زَعاعه
صارت بجْفالَه معذوره=ما عند أَحْدٍ لَه شِفاعه
الى نارت عن هاذولا=جتها من ذولا الطَّرقاعه "1"
والى جاها الفَقْرِي مع ذا=راحت للتاجر مِنصاعِه
قالت غَدِين أَزبِن عنهم=جُب مِظلم ماله قاعه
والا بر مابه والي=قَفرٍ مظماة ومجاعه
وحيشٍ ما قطْ وطِيْ به=غير ضْباه وشِهْب سْباعِه
قبل آقع بيدَين مْشفَّح=وقْعة ضبٍ في ردَّاعه "2"
هجَّت تركض مع الصفْرا=كنَّه مِرجاع الزَّراعِه "3"
تسحب ثوبٍ كبر الخَيمه=بين الرَّقعة والتُوساعِه "4"
وعيونَه تقل فْرَج موقَد=واثْمَهْ هبَاتٍ مهاعِه
واحجَّاها فوق جفونَه=تشبه لجْروف المِضباعه "5"
جدايلها من قتْلاها=قلايد قِفْر قعقاعِه
ود يودَهْ جِعلي ما اشوفَهْ=اشنون عِيابٍ منداعه "6"
ولْها شئ مثل الرَّكوه=ممخورٍ مثل البِلاَّعه "7"
ثرماً شرماً شينَة قِمَّه=صماً طرماً به شَناعه
ونعولَه بيبان قْراش=واذانَه تَكْرَع بذراعَه
هجَّت تِهرِف قيمَة كيلو=وهي من حتفَه ملتاعه
ساعة فاضت مع الطَّلعِه=والى المشَفوح بمطلاعَه
واقْمز مثل البسْ بحلقَهْ=قال أَدركتك يا الخدَّاعه
قالت هَبْ وطاحت رَوعِه=واخَذها المشفوح قْلاعِه "8"
أَثْر الكلب صحيب سويلم=اللي باشْوارِه ما طاعِه
راح يتحبَّل للدنيا=بالطَّمان وبالرَّفاعِه
بخْ بوجهَهْ يوم اِنهبْلَت=لوَّح علْيَه هالرَّعاعِه
ركْبَهْ واقبل بَهْ يسوقَهْ= مِرْكيٍ محجَانُه بنْخاعَهْ
يوم أَقبل بَهْ هجَّت أُمُّه=للسُّوق بليَّا دِرَّاعه
قالت وش ذا قال البِعْبِع=قالت وشُّو يالِكَاعه
قالت ياغْليَس اقلَع وفدِك=قال أَثرك يمَّه مِطباعِه
هذي ياميمتي الدنيا=أَم النَّيرات اللمَّاعه
إِرْبِطْيَهْ عندك بالدار=واكرميَةْ تعطيك ارباعَه "9"
قالت تبْيَهْ تدفق عقلي=عقلي يسوى كل طْمَاعه
قال انَّهْ يايوه هْدَيَّه=قلِيلَة شر ومِطْواعِه
قالت عجوزٍ هَتيانِه=دايم كِحيحَهْ وطْقاعَه
قال طقاعَه به غَناتِك=ما ناب أَخَبْرِك جزَّاعِه
قالت هذي حْمَارة التٌّويم=تَربض تنكربه خْمَاعِه "10"
شَبيه ما قَلل من عَيبَه=وقلوب أَحبابَه باصْباعَه
شاريها مَغبونٍ دايم=والرَّبح بكيس اللي باعَه
مع هذا كلٍ لَهْ عاشِق=على ما بَهْ من بِشاعِه
العًود اللي له تسعين=إلى البِزران الرضَّاعِه
واللي ما هوب مصدِقني=يسمع مدحَهْ بالإِذاعه
ولا اناب مْبرَّيٍ نفسي=أَنا أَعظم منهم جِشَاعه
ولا لإِبن آدم من جَمعِه=سوى ثوبِه أَو مرصاعِه
الله لا يفتنَّا فيها=فتنة عذاب ودَناعه
تم الوصف بْحِب الدنيا=الله يَرزقنا القَناعه
وهذا وصْف المجالس=أَبيَّن لك بعض أَنواعه
أَحْدٍ مسْكِت كنه بالمجلس=ما بان إِلا يبي له سَمَّاعه
واحدٍ يلعب هو والسَّبحه=والا هو واسْتيك السَّاعه
واحدٍ ما كِنَّه بالمجلس=ما بان إِلا راس كْراعِه
من شافِه ظنَّه زعلان=وهو تِعْوزِه البَراعه
واحدٍ يَزجر تقل مِحرَّج=أَو خطيبٍ في مذياعِه
واحدٍ ينادي كِنه غادي=والا تَيسٍ وقت قْراعِه
واحدٍ رافظ صورتِه خافِض=وهروجِه كلَّه نفَّاعِه
وأَنا كِنَّي بين الأُولَى=نطَّارٍ بيدِه مِقْلاعِه "11"