ماتاه عن دَرْبَ الوفا من يِرُودِه=ولا عَصَتْني في نِبَاهَ القوافي
معاني ٍللشِّعر لازِم تِسُودِه=صَدَّق عليها للحكيمِ اعْتِرافي
بالقلب رِيـمُوتَ التِّحِيِّه يِقُودِه=والنَّفس يِطْرِبْها جِبِينَ المْصَافي
شَرْحٍ لِفا بُشْرَى الحَيا منِ رْصُودِه=من عندِ ابُو عبدالعزيز امْتَلافي
هذا حَمَد - نايِف بْهُونِه وْكُودِه=مَعْناه مثْلَ الوَحْيْ وافي وشافي
جَتْني تِحِيِّه من نَوادِر ارْدُودِه=تَلْبَس لها ثوبٍ منَ الوِدّ ضافي
النِّتّ يحَفْظَ له وِثايِق اشْهُودِه=معروف مايِذْكَر عليهِ اخْتِلافي
مَلَكْت ساس الشِّعر حِتَّى عَمُودِه=رُوحِه تِجَلَّت في يِدِينِ احْتِرافي
أَخْجَلْتِني يامِن غَمَرْني ابْزُودِه=وَالْبَسْتِني ثُوبٍ عن الزُّود كافي
وَاعْطِيتني دَرْسٍ غلاكم وْقُودِه=دَرْسٍ تَرَبَّى بالْقلوبَ النّظَافي
قِصيدِتِك بينَ النّجومِ امْعَدُودِه=حُورِيِّةٍ تَزْهَى بْحَفْلَ الزّفَافي
حَرَّكْت بي فِكْرٍ تِطَاوَل رْكُودِه=عِقبَ التَّراخي بالسِّنينَ العْجَافي
ياشاعرٍ فوقَ الثِّريا جْهُودِه=ذَا وَاجِبَ اهْلَ الشعر ماهُوب خافي
ذِكَرْت مايِثْبِت ضِميري وُجُودِه=علمٍ حَمِيتَهِ عن ذَرَا كِلّ سافي
من عانِقَوا دَرْبَ المعالي جْدُودِه=ماعاش يَرْكُض للدِّعايات حافي
ماتِهْفِيَ الرَّجَّال قِلَّةْ نْقُودِه=ولاوِفَا من زُودَها كِلّ هافي
من يِنْحَدِر مَسْعَاه يَصْعَب سْنُودِه=وِامْرَاوِدَ العِلْيا خَذَا الحق وافي
المجد ساسَ المجد والطِّيب فُودِه=قَوَادمَ السِّبَّق تِشِيلَه خَوافي
حَبْلَ الوِفَا بينَ القلوب امْعَقُودِه=ماصَرِّمَتْ حِتَّى نِجِي له بْرَافي
من دَعْوِتِك ساق الشَّرَف لي بْنُودِه=ماعَنْك ياسَهْلَ الجنَاب انْصِرافي
قَلَبْت قافي يوم جَفَّتْ عْدُودِه=عَساه يِكْمِل بالمساعي طوافي
هذا بِعِيدٍ عن مَراسِم وُفُودِه=مارِيد من عندك جَوابٍ إِضافي
سلمْت يافكْر تَلاَلاَ عْقُودِه=تِسْتَاهِلَ التَّصْفِيق لك والهْتَافي