ماضي زِمان الذِّكْرَياتَ البِرِيِّه=بِمْنَاسِباتَ اهْلَ المِزارِع وْبَالعيد
النَّفْس في مَجْرَى حياتِه هَنِيِّه=ماصَادِفَت مَعْ شِدِّةَ الوقت تنكيد
جِماعِةٍ تاخِذ نِظامَ الرِّعِيِّه=يِمُكِن يِشِذِّ مْنَ الرِّعِيِّه مِفاريد
وَاهْلَ الهْدَايِه عندنا غالِبِيِّه=مِنْقَادِةٍ من دون شَرْطٍ ولا قِيد
لَهْ في مواقيتَ العْبَادِه مِزِيِّه=الأمر بالمعروف شِيمِه وْتَقْليد
وَقْتَ الصَّلاةِ إلى المِسَاجِد سِوِيَّه=ماتِلْتِفِت لِعْبِيد وِالاَّ إلى زِيد
عِيدِ ارْمِضانِ بْجَنْب عِيَد الضِّحِيِّه=يِثْبِت لنا صِدْقَ العقيدِه بْتَوْحيد
صَلاَتِنا في مَسْجِدَ الْمْعِيذْرِيِّه=وِامامِنا عبدالعزيز الْمْحِيميد
وِمْنَ الرِفِّيعِه نَاخِذَ الأَوِّلِيِّه=بِحْضُورِنا قِدْوِهْ بِحْسَن المِقاصيد
وِمْبَارَك الفايِز بْنَفْسٍ رِضِيِّه=يارَحْمِةَ الله له بْكِثْرَ التَّراديد
في ساقِتِه بَتَّال يِتْبَع مِجِيِّه=بالخير وِشْبِيكَان لَلوَقْت تَوْكيد
وِمْعَدِّيَ المعروف في طِيب نِيِّه=والصِّلّ مذكورٍ حْسَابَ الأَجَاويد
والهِجْرِس اللي عَايْلَتْهُم وِفِيِّه=وِضْوِيِحيِ اسْمِه عِنْدَ الاَجْوَاد تَمْجِيد
عَدِّيت منهم والخَواطِر فِضِيِّه=لاشَكّ والنِّسْيَان ماهُوب تَرْشيد
والعِذْر من ناسٍ لهم قَابْلِيِّه=قلبي بَشَر ماهو كْتَابَ المَرَاصِيد
ذاك الزِّمانَ اللي نْفْوسِه هَدِيِّه=حِيثَه تِدِلِّك للهْدَى دون تَشْديد
مافيه مَظْهَر من هَلَ الجاهليِّه=ولابْقَلبِه حِقْد بَعْضَ الـمَلابِيد
قَبْلَ الرَّخَا والطَّفْرة العالمِيِّه=اللي غَزَتْنَا بِاخْتِلاَفَ المواعيد
ياكُثْرَها بَانْواعَها الدَّاخِليِّه=طامِن وْعَالي ماتِفَرَّغْت للصِّيد
مانِقْعِدَ النَّايِم تحَتْ ظِلّ فَيِّه=أنا دِلِيلِك شِفْ قِرِيبَ المواريد
مَبْدَاه بالتِّلْفَاز بَاوَّل نِحِيِّه=وِمْطَوَّرَ التَّسْجِيل غِيرَ الأَنَاشِيد
والكَمْبْيُوتَر هو سْلاَحَ البِلِيِّه=والنِّتّ مابه حُرْمِةٍ للتِّقاليد
واليوم بالجَوَّال عِلِّه خَفِيِّه=من كِلّ عِيبٍ فيه كِلَّ المنَاقيد
حضَارِةٍ بَهْ خِير لِيتَه نِقِيِّه=والخِير بِه هالوقت قِلِّه وتَزْهيد
ماوِدِّيَ اشْرَح زُودْ والنَّاس حَيِّه=يَدْرِي بِه اللِّي منِ حْسَابَ المَوَاليد