لـك ماتبي وأمرك على العين والراس = حاضر و ناضر بالعيون الحقيقـه
لـو أتأخر يـا حبيبي على النـاس = عليك و الله مـا أتأخر دقـيقـه
شي تعرفه من عـرفتك لـه أساس = عليه معطيك العهـود الوثيقـه
يـا جوهـره يالـول يـادر يالماس = يـا عسجد ماقـد تغير بـريقه
ما عندي أولى منك يـا عطر الأنفاس = ياللي العسل والقند من ذوب ريقه
ولآبه أغلى منك يا زاهي الألبـاس = عندي وكل له نظر في عشيقه
شوفك يزيل الهم والغم والبـاس = و يجلي عن الخاطر خطر كل ضيقه
وصدك يخلي صـافي البـال ينحـاس = و يشعل بصندوق الضماير حريقه
دام الرجـا ما حال من دونـه الياس = و الوصل له تسعين حل و طريقه
عذب الغرام الحر من يدك بـالكـاس = قـم أسقنيه الله يسقي سويقـه