البارحه ماذقت للنوم لذات=علمٍ لفا خلاٌ عظامي هميده
علمٍ تقل حلمٍ غشى القلب بالذات=وانهارت اعصابٍ من اول حديده
علمٍ عجزت استقبله بالمراوات=لين انها صارت علومٍ وكيده
علمٍ زرع بالقلب حزن المفاجات=وبالكبد من كبر المصيبه وقيده
قالو حمد حكم القدر فيه كد فات=وافاه يومٍ لازم انه يصيده
حكم الله الغالب ولا فيه ردٌات=راضين باقدار الولي في عبيده
مرحوم يامن نذكره حي مامات=وحيد وقتٍ ما تناسى وحيده
اخذت انا وياه عشره وسجٌات=كنه عضيدٍ لي وكني عضيده
مرحوم ياعز الأهل والقرابات=يمشي بدرب الطيبين ويجيده
مرحوم يارجل الصخى والمروات=ياللي على دارك عنيزه فقيده
مرحوم يارجلٍ يشيل المهمات=لو انها كبر الجبال وتكيده
مرحوم يامن صار للشعر مشكاة=الشعر يطرب من حلاوة قصيده
مرحوم نرفعها لرب السماوات=ربٍ وعدنا رحمته نستزيده
انه يوسع له بقبره مساحات=وبجنة الفردوس يرفع رصيده
آمين ياربي تغفر الخطيٌات=عفوك وجودك للنفوس السعيده
وصلاة ربي عد فرض الصلاوات=على نبي الحق شرع وعقيده