ليت الليالي ما فجتني بغالي=وليتي قضيت العمر مع زين الأوصاف
لكن نزل بالراس ضيف يلالي=ما فاد به طب الدخاتر والإسعاف
جاني على غفلة وصابن جفالي=قلبي غدا من رجفته يرجف إرجاف
أسقاني الحلتيت من عقب حالي=وثويت في بيتي عقب راس مشراف
عقب اللذاذه غطلسن الليالي=ما عاد تطرقني بهالليل الأطياف
وينك ربيع القلب يا هملالي=مثل الذي يرجي من أشجار صفصاف
هوت صروحٍ شيّده لي خيالي=ونقضت ساس الحب سافٍ بثر ساف
طرد الهوى بالله مالك ومالي=مواطي الرجلين هشّات ورهاف
يا عين لا تبكين وقتٍ مضى لي=لو إن ما للروح يا عين قطاف
مير ابصري ثوب الملذات بالي=يا سرع ما يعطي لك الوقت باجناف
ولاظن مخلوقٍ من الهم سالي=واللي سلم قلبه من الوقت خواف
لابد ما يجري له اللي جرى لي=ويصير بالدنيا تقل فوق حذّاف
يا الله يا رحمن تلطف بحالي=ترحم عليلٍ دمعه اليوم ذرّاف