ياروح ياروح التميمي أناديك = جاوب نداء الي يابن الأجواد ناداك
وش قولك بشخص ٍ يعزك ويغليك = ولا أحد ٍ يلومه يالسنافي إلى أغلاك
الله زرع بضلوعنا لك وأراضيك = فيها إحترامك وأنت تستاهل رضاك
إطلب فدى عيونك وتامر وأنا أجيك = لو كنت في نومي على أمرك ويفداك
حر ٍ ولك بصمه مع الطيب تغنيك = مع الوفاء مامرة ٍ خاب من جاك
في مجلس عنيزه نودك ونغليك = وبضلوعنا مجلسك ياليت نلقاك

كان انت زعلانٍ نجيلك ونرضيك=مجلس عنيزه وش يساوي بلياك
تسلم لنا روحك ورفعة معاليك=ويسلم لنا نبضك وصوتك وطرياك

يابودحيم الذوق لبيك لبيك=يفداك منهو يا أبيض الوجه لبّاك
أحرجتني بالطيب ربي يجازيك=الله يعزّ اللي على الطيب ربّاك
لبّستني ثوبٍ من العز بيديك=من طيب ذاتك يالشقردي وحسناك
وأنا تركت الكار والله ما أخفيك=وجنّبت درب الشعر والمزح لولاك
واجب علي أرد صوتك وأناجيك=وصوتي تشرّف يوم بالشعر ناجاك
لو كنت مقدر بالمشاعر أجاريك=واقبل عذر منهو تمنّى مجاراك

يابوعزيّز طبعك السمح يمليك=أصيل بأخلاقك ولفظك ومعناك
لا يدخلك ريبٍ بقدرك وتشكيك=الله يحَفْظك يا رفيقي ويرعاك
ما نيب زعلانٍ ولا نيب شانيك=ماعاش منهو بالتماثيل يشناك
حنا نحبك وأنت تدري ونشريك=واللوم لو به لوم جنّب وعدّاك
والمجلس الغالي مربّع بأهاليك=ومحدٍ يعزّه كود مثلك وشرواك