راجع وأنا قلبي من العام مجروح
راجع تبي نسيان ما فات وياك

راجع وعينك تذرف الدمع مسفوح
وفر دموعك ما بقى غير ذكراك

إن جيت ولا رحت ما أشوف مصلوح
ريح ضميرك وابتعد ما فقدناك

العام قلبي ما شكى الجرح مذبوح
يرجي وصالك ويرتجي يوم لقياك

واليوم مالك منزلٍ داخل الروح
مات الغلا من يوم غرتك دنياك

قلبي لقى غيرك مع الناس مملوح
ما هوب يرخص من شرا الحب شرواك

ابعد وبابٍ للغلا كان مفتوح
بيديك هديت الغلا من سواياك

مسموح ترحل عن حياتي و أنا أروح
جرب ترى الدنيا بها دورة افلاك

خلن أعيش أفراح وتعيش بالنوح
وتذوق ما ذقته من أسباب يمناك