مليت من كذبك وخاب الرجاء فيك
عذرٍ ورى عذرٍ أشوفك تجيبه

يكفي تعب يكفي شقاء في رجاويك
تكفي جروحٍ علته من طبيبه

يوم إن قلبي مخلصٍ لك ويغليك
أثرك تسلى بالهوى تلتهي به

حطيت قلبي يالغضي بين اياديك
مصيبةٍ جرت وراها مصيبه

شخصٍ تبيعه بالغدر كان شاريك
لا بد ماينباع قلبك غصيبه

هجرك وصدك مع لياليك تغويك
دربٍ مشيته بالغدر تنتهي به

وقتٍ مضى والعين ما أظن تبكيك
وما أظن اذرف دمعةٍ مستصيبه

خلك بعيد وعفتك اليوم مابيك
فيك انخدع قلبي وهذا نصيبه

هذي سواتك والله اللي يجازيك
هذي سواتك والمصيبه غريبه