قصيدة ترحيبية بصاحب السمو الملكي
أمير منطقة القصيم
ألقيتها هذه الليلة
29/5/1432
في حفل إفتتاح دارالتراث بعنيزة
وتكريم رئيسها صالح الفرج

من الهجوس اللي تصوغ الأساليب =ومن اللسان اللي برآسه ذرابه
ومن الضلوع الناحلات المحاديب =ومما حَوَنِّه بينهن من رحابه
وعن المحافظ منقع الجود والطيب =أبو حمد وجه السعد والحبابه
وعن الرجال مْكَمّلِين المواجيب =أصالةٍ عني وعنهم نِيابه
ربعي إلى عزّت عليّ المطاليب= مِحزَم بريم وفوق رآسي عْصابة
مستشعرٍ واجب ومستبعدٍ عيب =لابد من وقفه وكلمة وجابه
الشعر ماهو وزن ولا تراكيب= الشعر فنٍ راقيٍ يعتنابه
إن كان ماجاء له حضور ومحاضيب =لا حيّ قيفانه ولا مرحبابه
لابِالله إلا جاء يسوق التراحيب =لعيون صقرٍ باللقا يِعتزابه
يامرحبا ترحيبةٍ تَنفي الريب =وتثبت محبة بالقلوب وصبابة
لأميرنا فيصل حصان الأطاليب= رقى سنام المرجله واعتلابه
يابن الملوك مْثَبّتين المناسيب =على عزى التوحيد ثقل وصلابه
سِتر البلاد إلى عوى الذيب للذيب= وِاختلطت أوراق الرؤى والتشابه
لمّوا شتات اللي ذَرَتْه الهباهيب =وِرثة جدودٍ ماعليها طلابه
وش يطلبون مْرَوجِيِن الأكاذيب =ماعندنا شيٍ نَخاف ونهابه
اللي تِجِيِعِرها على صفحة الوِيب =ماتدري إن الدار دونه ذيابه
فليخسئوا وبحيل من يعلم الغيب= مايدركون من النوايا هَبابه
يا اميرنا حلَلْت أهل ومعازيب= ووطيت سهلْ وجَرهدٍ يِمِّشابه
وهلّت بواكير المزون النواصيب =سعادةٍ تملا المكان وحضابه
برعايةٍ منكم كَريمة مقاضيب =أنور فضاء دار التراث وجنابه
دارٍ بنوها بالظروف الشلاهيب =عُصبة عيالٍ عَزمهم يُقتدابه
يِرَوبون الماء من القلّ ترويب =حتى بَدَت كَناطحات السحابه
وصارت مزارٍ للأهل والأجانيب =فخر القصيم ومعلمٍ يهتدابه
من جاء لها يلقى بشاشة وترحيب =واحجِةٍ طلقه ولطف وطيابه
يستاهلون المدح حِشمة وتَوجيب= وإكرامهم فرضٍ علينا نصابه