ما كل ما يعلم تراه يقال
ما كل ما يعلم تراه يقال=قلّط ووخّر والعلوم طوال
كم جرى من عبرة كنيتها=خوفي على خافي حشاي يقال
وطبقت صندوق الضمير وحرها=نار تلظى بالضمير إشعال
وكم بت أقاسي بالزمان شدايد=ليل ونهار ما اهتنيت بحال
حوادث من عظمها في خاطري=ثقله على قلبي خشوم جبال
وهادنتها بالصبر لين تمزعت=تمزع خيال كد حداهشمال
كم زاهف يزهاه قبل وقوعها=ومن بعد ترّث في حشاه علال
ياما شهاها جاهل في محضر=صخيف عقل ما ورد بحبال
يوم اكترب حبل التجاذيب وانكشف=غيب الدهر صار الحصان زمال
أول علوم الشر هرجة مجلس=واتلاه نار الوقود رجال
واحذر من الضد القديم تحطه=لك مسند أو ينكشف له حال
عدو جدك لو صفا لك نسله=تراه من الغيظ القديم ينال
إلى زلت أقدامك وشاف ضربته=داسك ليما يصبح طريق نعال
ومن كثر هذره صاير قدر غايته=وللناس وضح غير سين ودال
وصاحبك لا تجني عليه مذلة=إن طاح طحت ونور عزك زال
والصدق مصعاد الرجال إلى العلا=ومراتب عند الإله طوال
والكذب يورد صاحبه مهالك=ومسالكٍ يشقى بها عقّال
ومن دق عرض مغفل متعمد=فاجزم فلا هذا نتاج حلال
ومن حب رفع النفس يدفع خاطره=عما سوى ماله يحوش جلال
ومن سفلةٍ ما نال عمره طولة=يشرب ولو شاف الشراب غسال
ولا تكره أمر الله على كل صايب=وما قدّر الباري زواله زال
والصبر في كل المواضع فايد=إما بدنيا أو بصلاح أعمال
وإياك والحق المصيب تغطّه=تراه يظهر بالمغيب هلال
ومن يعتمد رايه ويزهد بالملا=يسري ويصبح ضايع باللال
ومن يجعل الخلان كل صاحب=وكل وثيق فاعرف إنه عال
وكم من ترى من جامع ماذاقها=مستعمل طول الحياة أو ذال
لا عاش معزوز ولا عز نفسه=يقطعك يامال كساه وبال
أشوف وأغضي من زمان فايت=ولا نيب ملزوم بقيل وقال
وإياك والزود العنيف على الملا=ومن والفه تاه الطريق ومال
(ومن قال أنا حاش العنا) ودلايله=طبايعه تلقى حداه هبال
قلته وأنا قلبي يفيّض ويمتلي=من الضيق مالي من جداي اسوال
بهرت من طول الزمان مسمّر=أدعي ولا لي من يجيب سوال
لي ربع ومن قبل ذا حاولتهم=بتقضاة حال ولا شفوا لي بال
نخيت ثم نخيت بأعلى صوتي=في ساعة وادي نظيري سال
لما نحت شكيتي لنحيّتي=هجّوا كما زمل حداه جفال
وضليت من ضيم الليالي واقف=ما واحد عوّد علي أو مال
ظني بهم من قبل ذا مطولتي=يامعزتي وأمر الصديق يسال
والظن ضاع وتهت في ظني بهم=الروس روس والذيول أذيال
وعنّزت في شكواي ثم رفعتها=لجود الإله ورحمة الله فال
إن كنت متنوك ومكروب الحشا=فلا كربة ما سوّ شره زال
كم ذا ترى من كربة تراكمت=عظايمٍ وعلومهن طوال
وافترّ دالوب الفرج عن غيّها=ولاح السعد للناظرين هلال
خلي تلاينته وليّن جانبي=بالمكر لين إن الفؤاد اهتال
أدلت علي بمدالي وصدقتها=ودنيت أبقضب من دلاه حبال
لما رمان بغيه وتحيِّله=رد البرا وادعى حشاي علال
واحلوها لولا جفاه ومكرها=مقبولة تسبي عزا العقال
عيطا طموسٍ عندلٍ مقبولة=مسلوب وسط ما هواه عيال
لا واللطيف ماهاللطيف من الملا=ذا نور حور ما وراه ظلال
استسلمت روحي ولب ضمايري=وسرايري لما إن عقلي زال
ولا حر نار إلا وحر مودته=من بعد هجره ما صحا لي بال
روابعي يومي بها حلو النبا=مدري جنوب او هواه شمال
الله حسيب كافي للي نوى=قتلي وعن حقي يميل ميال
له قلت واصل من تعلق خاطره=ياسيد روحي ما الليال طوال
ولا وفا ولا هفا ويريدني=بين الرجا والياس طولة بال
وأنا أتجلد من زمان فايت=لما رمينا بين سين ودال
ياليتني ما طعت نفسي والهوى=توي دريت إن الهوى قتال
لكن ذا حد النصيب وختمها=ولا بد من المولى عنه بيسال
ثم الصلاة على النبي محمد=ما ناض برق في طبوق خيال