مرثيته في الشيخ
محمد بن صالح العثيمين
رحمه الله
ليلة خميس وكـلٌ حـيٌ وشانـه=ذاع المذيع اللي فجانـا بالاعـلان
شاع الخبر عبر الفضاء من بيانـه=هزٌت معه كل النواحـي والاركـان
قال اسمعـوا والله عظيـمٍ بشانـه=الموت ما يسترجعه طول الاحـزان
الروح لابـن آدم سـواة الأمانـه=ان حل ميعاد الوفاء والسفر حـان
شيخ الديـار اليـوم خـلاٌ مكانـه=من جامع الديره ومن كل الاوطـان
لو لا الله اعطى النفس صبرٍ واعانه=كان البكى بالناس باشكال والـوان
أمه عنيزه وارتـوت مـن حنانـه=تبكي على ضمه مع اهلٍ وجيـران
وامر القـدر حـدد مكانـه وزانـه=بأم القرى له بالثرى خير مسكـان
شيخٍ عطانا من علومـه حصانـه=بيٌـن لنـا بهدايتـه كـل برهـان
مالـوم ياقلـبٍ بـكـاه ابتكـانـه=لك حق موته به مصيبه وخسـران
مرحوم ياشيـخٍ مـن اول زمانـه=بالحق سيف وحامل الحق سلطـان
مرحـوم ياشيـخٍ عفيـفٍ لسانـه=قلبه صفاء للدين في كل الاحيـان
مرحـوم ياشيـخٍ عليـه الرزانـه=جسمه رحل لكن علمـه بالاذهـان
مرحـوم ياشيـخٍ بحلمـه ليانـه=لأهل التقى وإلا المضليـن بركـان
ربي حفظ دينـه بمثلـه وصانـه=يجزيك في تقديم الإحسان باحسان
يفتح لك الفردوس باعلـى جنانـه=في رحمة الله مسكنك ذات الأفنـان