[روح التميمي]

أرجوك يا خالد ترفق بي جروح=إن كان يالغالي تهمك جروحي
ما عاد بالماضي غناةٍ ومصلوح=وماشوف بالحاضر علاج لروحي
لي جملة أيام وانا تقل مذبوح=وكبدي على حمو الملايل تفوحي
حالي ذوت .. والروح تنزف من الروح=والهم يلعب بالخفوق ويجوحي
ولا تنشدن تكفى ..! ترى الجرح مفتوح=هذا قدر مكتوب سِجّل بلوحي
من عقب ما كنا بسجّات وفروح=ودرب المحبة في هوانا سموحي
ومن عقب ما كنا نذيب الهوى بوح=ونحيي ليالينا بعذب المزوحي
جانا نصيب بدّل الفرح بتروح=وخالط قراح الحب سمٍّ ذحوحي
عينٍ وصابتنا وحطّت بنا قروح=يقطعك يا حظٍّ رديٍّ شحوحي
بقلوبنا (مات الهوى) وانقلب نوح=وصرنا نعيشه في مياتم ونوحي
أنا هويته جد ما هو هوى مزوح=وأوقفت له فكري وشعري وبوحي
ومن طالع عيوني لقى السر مفضوح=والعين للعاشق حروشٍ فضوحي
يا شمعة أحلامي طفت واختفى الضوح=ويا وردةٍ كانت نهاية طموحي
وداعة الله ..! والعباير لها فوح=أقولها وبكل عزم ووضوحي
وياخالد جروحي ..! ترفق بي جروح=وأنت بسؤالك صرت خامس جروحي!