سلام يا مخيم هل البن والهيل= أهل الكرم والطيب وأهل الشكاله
كل واحد منهم مثل حادر السيل= ماحدن يحسّب وش نقص راس ماله
ربع حشام ما عليهم مداخيل= المرجله فيهم كبير هلاله
كل واحد منهم كثير المحاصيل= يشب نار المرجلة من حلاله
لقّم ثلاث دلال واوفى به الكيل= برية من حب صنعاء مناله
صفا بتنتين وصف المعاميل= والثالثة بهر بها من دلالة
البن الأشقر يزعجه بالفناجيل= هبهب رياح اللي يمين وشماله
ساقه لعكفان الشوارب مواصيل= أهل العطاء واهل السخاء والجزاله
في خيمة منصوبة باطرف الميل= وسط الغميس مجوّده في حباله
بارض المصفر كنها طلعة سهيل= بين الغضاء حدر النفوذ ورماله
تلقى السوالف وسطها والتعاليل= قاف على الطاروق كل عناله
به للنشاما والعوارف مداهيل= والقصر يعرف من رحابه ظلاله
امخيم ما فيه جرح وتعديل= الله يرحم من بناه ودعى له
ذولا الكرادا كل ابوهم حلاحيل= الجد طيّب مير ذولا عياله
ادناهم اللي من خيار الرجاجيل= مثل الجمل لو بيرك لحمل شاله
عيني عليكم بارده يالمشاكيل= كل بباشر فزعته في مجاله
يوم ان ولد اللاش له غزة الذيل= حلو كلامه مير ما من صماله
بعنيزة الفيحاء بجيل بعد جيل= تاريخكم يشهد لكم بالجماله
سيروا على هذا وحذرا من الميل= ترا الزمان ادوار في كل حاله
صلاة ربي ما تهل الهماليل= على نبي حافظ للرسالة