[ابن الخطيب]

حدر السحابه بعد ثلث الليل من قبل الفجر=هاضت قريحه واستطاب الشعر وعيوني نعاس
ماهيب سبّة لوعة المغرم ولا سبّة هجر=مير القوافي ودّها مبنى ونادتني اساس
الله خلقني طارق احساسي وخفّاقي نجر=كسرت به بذرة هواجيسي وخالطت النحاس
زرعتها ما كنت ابيها تاصل لحدّ الشجر=لا عاد تنشدني علام اليوم محصولك يباس!!
اكبر ذنوبي جيت ادوّر فيك يالجاهل اجر=سادس حواسي شعر يا سادس حواسك اقتباس
مشكلتي انّي كل ما جيت ارمي ابليسي حجر=يناظر بعيني ويضحك قال: يا زينه يا ناس!!
شفني على حطّة يدين النار واحذر لا انفجر=اخاف اضرّك لو قربت شوي وشلون المساس؟
خلاص ما عاد بشعوري حيل يا ليت انحجر=حاولت اعرْف لوين ياصل بي ولا يقبل قياس
احراج يا شعري ترى ما اجنيت بك شيك واجر=امّا ابيعك والضمير الحي ولاّ قم تواس