[عبدالرحمن العقيلي]

يا صاحب قلبه بعيد واراضيه
ياما عنيت وشوفتي له منعها
راضي ولو ما هوب عدل تسويه*
الا منعت النفس تلحق طمعها
أخبرك عن نفس لك العمر تمشيه
تعتز في حبك وهجرك فجعها
لو ما معك عذر لفرقاك تبديه
اعذارك بقلبي حناني صنعها*
يقول لي ما دمت بالحيل مغليه
اصبر على نفسه لو انه رفعها
قلت ان قلبي دفتر الياس راميه
وصفحة جفاه من البدايه مزعها
صبري محيط ماتبين موانيه
ماله حدود وكل ضيقه وسعها*
نفسي بصبري مركب ماتخليه
والنفس بالمركب شف القلب معها*
والقلب لامنه تعلق بغاليه
لو جاه هرجة ناصح ماسمعها
حيث انها فزة خفوق تمشيه
لدروب لولا اللي بها ماتبعها
ياناصحين القلب مافيه كافيه
ان كان تدرون القلوب وولعها
لو قيل نفسك كل شي تلبيه
بامر الحبيب وقل لنا وش نفعها
اقول خلوها بدربه تباريه
اما رفعها الحب والا وضعها