حلو الخليفة .. لمحمد العبيدالله

[روح التميمي]

أسعد الله أوقاتكم بكل خير .. تعبيرا عن اعتزازي

بالمنتدى وأعضائه أضع بين أيديكم آخر قصيدة كتبها

صديقنا وحبيبنا محمد العبيدالله .. وهي هنا تُنشر لأول مرة

حتى مجلس عنيزة لم أنشرها فيه حتى الآن ..

ومناسبة القصيدة الظاهر إن أبو أحمد شايف له زول غزال

ليلة العيد يشتري حلا العيد من محل الخليفة بعنيزة ,

وتعرفونه قلبه خضر .. والله أعلم إنه ما نام هاك الليلة إلين

كتب هالأبيات .. يقول :

يقبلك يا شرّاي حلو الخليفة=تبي الحلا وأنت الحلا بك على الزود
خل الحلا للي من الناس شيفه=وإلا أنت قسّم تفرح البيض والسود
من زود زينك والهروج اللطيفه=وعيونك اللي كنّها ملح بارود
تراك لو قسّمت لين النصيفه=والله ما ينقص جمالك ولا عود
يجمّ زينك مثل بيرٍ مريفه=الله يجيرك من حسد كل مقرود
وإلا مثيل الشمس نوره وطيفه=ما ينتقضص دايم على الطول ماجود
بالزين زينك ما يشاهد وصيفه=خلاك ربي بالحلا تقل عنقود
خابرك يوم العام رجلي خفيفه=ما ردني دونك مسافات وحدود
يوم المزون اللي توالى رفيفه=الغيث يهمل والنشو برق ورعود
واليوم من فرقاك حالي كسيفه=تدري وراع الحب ما عنه منشود
والله ما صديت نفسي معيفه=مير الزمان اللي حداني على الكود
ياطول ما قلبي تزايد رجيفه=لا جابك الطاري وأنا عنك مردود
القلب ما ينسى مودة وليفه=يسري به الهاجس كما تسري النود
منساك يا راع العلوم الطريفه=ياسلوة الخاطر إلى صار ملهود
يا همّ قلبي وأنت عيده وكيفه=جعل الرجا بك طول الأيام ممدود

أبو أحمد ـ محمد العبدالعزيز العبيدالله ـ 1/10/1427هـ