@@ ذكرى عنيزة طيف كلن يحبه @@

[حمد بن عبدالله العقيل]

بسم الله الرحمن الرحيم
@@ ذكرى (عنيزةْ ) طيفْ كِلِّنْ يِحِبَّهْ @@

ذكرى (عنيزةْ ) طيفْ كِلِّنْ يِحِبَّــــهْ
من يوم يِطْرَىْ طارْيَه من مْحِبِّيْــــن
طيف يذكِّرْنِي (بصُفِّهْ) (وقُبــّــــه)
وشوارعَهْ واهلَه وذيكَ البساتيــــــن
والسكة اللي بالعراقة تشبــــــــــــــه
بيبان دوره نبع نخل محطيـــــــــــن
منقوشة من زاهي اللون حبـــــــــه
مع قبة بالسوق مبطي مسويــــــــن
فيها مثاعب مايلات وذربـــــــــــه
مع (التسواتل) للطوايق مغطيــــــن
ماضي تليدْ (وخَنِّةٍ ) لَهْ وطَرْبـــــَــه
إِلَى توجَّهْنَا وْحِنَّا مَشَتِّيـــــْــــــــــــنْ
***
لاْ مِنْ وُصَلْنَا مِنْ سِفَرْنَا وغُرْبــــــه
نَبْدَاْ نشم عْطُوْرَهَا والرِّيَاحِيـــــــــن
وسط الفلايح والنسايم تهبـــــــــــــه
بين النخل وترنج واعناب مع تيــــن
واذا دخلنا سورها نحتفل بـــــــــــــه
ونلقى مبانيها قصور ودكاكيــــــــن
وبْيُوْتْ (طِيْنٍ) شَاْمْخِهْ نِفْتِخِرْ بــَــــهْ
مَبْنِيِّةٍ مُبْطِيْ مِنْ سْنينْ وسنيـــــــــن
واذا دخلنا بيوتها ننسحر بـــــــــــــه
مما نشوفه من هل الجود مغليـــــــن
(ليِوَانْ) مفتوحٍ ونارٍ نِشِبـَّــــــــــــــه
يِحْمَسْ عليها (البِنَّ) بيدين (ذربيـن)
والى استوى لونه وزانت نكبــــــــه
الين تبرد ثم نحشاه بيديــــــــــــــــن
في (نجر) اصفر من نحاس مصبــه
وايد النجر لا صال صوته يداويـــن
ونشوف كيف (يبهر) البن حبــــــه
في (قهوة) مفتوحة للمخاويــــــــــن
فيها (كمار الجص) نقشه (يْسَبـــِّـه)
(ودلال) مرصوصه (جلوها) حريصيـن
وفيها (وجارٍ) من حطبنا وشَبــَّــــــه
مع طاق فيه من الغضا تو شاريـــن
***
مع (دلة الرسلان) ودك تصبــــــــــه
لا عطرت بالهيل زينة مزاييــــــــــن
لا فاح ريحه وِدِّكْ انك (تعبــــــــــــه)
تشرب فناجين وراها فناجيــــــــــن
معها (كنيزَ) التمر ليتك تلبــــــــــــه
مكنوز في (جصه) يجي حول شهريـن
في (مطبقية) معدنٍ جات سكبــــــه
معها(غضارة غرش) به زبد ولبيـن

واذا بغيت الماء فهذيك (قِرْبـِـــــــهْ)
ماها يسرسح لا شربته على هويـن
مربوطة في سقف اثله بثقبــــــــــه
ومعلقه (بالشاغية) (والمحاجيــــن)
أفك حبله ثم ينساب عذبـــــــــــــــه
معي (غضارة )شرب نقشه يسليــن

لين (امطرت) فاحت من الطين تربه
والطين لا جاه المطر ينثر الزيــــن
عطر يفوح ومسك ما اقدر أشبـــــه
لان ما مثله من العطر هالحيـــــــن
سووا (حنيني) بر من صنف نخبــه
مع (العبيطه) يعجنونه بالايديـــــــــن
وحطوا لهم جمر حمر دون لهبــــــه
وفوقه حنيني اسمر اللون تفنيــــــــن
وزادوا عليه الزبد من وسط علبــه
مع الترنج الحامض الطعم تزييـــن
لا قام (يتشتش) حط ايدك (ولبــــــه)
مع صوت رعد بالسما برقه يبيـــن

الى جلست بمجلس بين قُرْبـــِـــــــه
تشعر بقيمتهم وتسمع دواويــــــــــن
وتحس في روح الأصالة تنبـــــــــه
وتقول: بعنيزة ترانا مقيميـــــــــــن
دار الجدود اللي نفوا كل كربــــــــه
حموا حياضه من شرور المعاديـــن
دار السخا والمرجله والمحبـــــــــه
واهله صقور عاليه مع شياهيـــــــن

والى دخلت الدار امشي وانبــــــــــه
واشوف فيها الطيب واهل موديــــــــن
ما اقدر اواصل حيث دمعي اصبـــه
الى تذكرته والاها تبكيــــــــــــــــــن
ابا اعتذر للي قرا الشوق صبـــّـــــه
من قلب عاشقها عسى الحب يدنيــن
حمد بن عبدالله العقيل
2/6/1433هـ الرياض