ابعد عن العيب وكن حذر ومحتاطي=الي تغثلاك شد حزامك ونطه
تراه يوردك لدروب ماتنهاطي=حتي يلبسك ثوب علوم منحطه
تصير عند العرب هذار خراطي=وكفة موازينك تعود علي البطه
من عقب منتب عزيز عندهم ساطي=غديت ماعاد لك خطوة ولا نطه
ناس تملس لك بحب وهو غاطي=وناس تعلق بزود الهرج وتحطه
كبر طميه ويفرح لك بالاحباطي=اسود ضمير يبرهن لك علي الخطه
جنب طريقه تراه للحكي لغاطي=سربال رجل يشيل الشر ويحطه
لاترافق الا صميدع رجل اصباطي=تلقاه الي ضامتك دنياك بالشطه
هذاك حطه معك سباح بالشاطي=يفزع الي صادك الشاذوب ويلطه
يدفيك عن زمهرير ولسعة شباطي=ان هب نسرية هوجاء ومنقطه
رجل علي حزة الشدات محتاطي=ماهوب دغلوب نقع ناشف شطه
يضرب علي الكايده في كف مخباطي=يضحك حجاجه ولاينشد عن القطه
اكرم كريم ولابه طبع خرباطي=وان مد لك مدت ماهيب خربطه
والا الردي لو طلبته ابرة اخياطي=تشوف وجهه علي ماقيل عرقطه
يشرق بريقه وتسمع له تشفاطي=عشاه من فول عثمان من البطه
والناس اجناس ذا عالي وذا واطي=وذي خلقه الله ولاتشمت به وغطه
من عهد يافث وكل الناس خراطي= بالالف خمسه تشيل الجود وتحطه
العرض الشجري