مايِجْتِمِع صومٍ وذكرٍ وقُرْآن مَعْ شِعْر

[أبو زياد]

بسم الله الرحمن الرحيم


مايجتمع صوم وذكر وقرآن مع شعر

شَهْرِ ارْمِضَان امْكَبِّلٍ كِلّ شيطان=الله فَرَض له مِيزِةٍ بالصِّيامي
عِندَ اوِّلِه رَحْمِه وثانيه غُفْران=وَاخِر يِجِي عِتْقٍ بْخيِرُ اوسَلامي
شهرٍ يِعيِنَ النَّفْس في زَرْعَ الايمان=راحَةْ عِبَادَ الله صِيَامُ اوقِيَامي
عِقْبَ السِّنِه نِحْتَاج تَنْظِيمَ الابْدَان=ايِضا شُعورَ المجتمع به نِظامي
والنَّفس تَهْدَا والصِّفَاوِه بَالاذْهَان=مِظَاهِرَ المسلم تِزِيدِ احترامي
نِسْتَقْبِلِه بالحُب والقلب فرحان=نِعْطِيه من صَفْوَ اليِقِين اهْتِمامي
مَبْدَا الفَرح في مُبْتَدَا شهر شعبان=في فَضْلِه الماثور حلو الكلامي
بَعْده يجينا رُكْن من بينَ الاَركان=الله يِوَفِّقْنا لِحِسْنَ الخِتامي
شَهْرَ الصِّيام ابْوَافِر َالخير مليان=هو مَوْسِمَ الافْرَاح في كل عامي
الله يِمَتِّعنْا بْصُوِمَه الى حان=حتى قِيَامِه بالرِّضَا والتِّمامي
والشِّعْر وَقْتَ الصُّوم ماعَادْ لِه شان=رَاحَتْ عليه-اليِوم ماله مِقامي
مايِجْتِمِع صومٍ وذكرٍ وقُرْآن=مَعْ شِعْر لوهَازِه تِفَق كل رامي
إلى دَحَرْت ابْليس للرِّشْد بِيبان=وِالاَّ الهوَى للنفس مثل الحرامي
الحق بَيِّنْ قالوا الحَقّ سُلْطان=إِلْزَم سِبِيله مَعْ طِريقَ الكِرامي
مَعْ خاتِمَةْ شعبان نِيِّه وْبُرْهان=حَظَّ القلوب الفايِزِه بِالْتِزَامي
نِظَافِةَ النِّيِّه وتَقْدِيمَ الاحْسَان=والنَّفْس ماتِخْفِي نِكَدْ واخْتِصامي
آخِر شَهَر شعبان ساعة امْسَيَّان=بِقْلُوبنا للخِير مِثْلَ الهِيامي
اليوم ماللشِّعْر ساحِه ومِيدان=بالشَّهْر يَلْحَقْنِي كِثِيرَ الملامي
وِالى عَطَا الله عُمْر فالوَقْت مِيزان=نِشُوف وِشْ يَقْدَر عليه المْحَامي
واللي يِرِيدَ الله بْعِلْمه لنا كان=والشِّعر تَنْفِيسَ الهمُومَ الْعَظامي
صلاة ربِّي عَدّ مَوْفُورَ الاَمْزَان=على النِّبِي مشفوِعةٍ بالسَّلامي

عبدالرحمن بن عبدالله الهقاص (ابـوزيـاد)
25/8/1428هــ

[روح التميمي]

اليوم ماللشِّعْر ساحِه ومِيدان=بالشَّهْر يَلْحَقْنِي كِثِيرَ الملامي
وِالى عَطَا الله عُمْر فالوَقْت مِيزان=نِشُوف وِشْ يَقْدَر عليه المْحَامي
واللي يِرِيدَ الله بْعِلْمه لنا كان=والشِّعر تَنْفِيسَ الهمُومَ الْعَظامي

وشلون يابو زياد , يعني نعزّل ونصك المنتدى برمضان ..!

ههههههههه .. صدقت يابوزياد

لله درك على المعاني الصحيحة والتعبير السلس

والشعر نلحق عليه إن شاالله ..

لا هنت يا الناصح بنظم وقيفان=عسى الولي يحفظك دوم الدوامي
هذا الكلام اللي به الحق يزدان=ما يجتمع شعرٍ وذكْر وصيامي

مشكور يابو زياد .. الله يعطيك الصحة والعافية

وكل عام وأنت والأسرة الكريمة بخير وصحة وسلامة

والشهر عليكم مبارك ..

تقبل تحياتي