خـطـيـبـيـّـات

[ابن الخطيب]

واثوبي اللي من الدمعات يتبلّل=فقد محمّد وصوت محمّد النوري
ما جيت احلّله لكن جيت ابتحلّل=من ذنب بعدي ومن سيّات بقصوري
كلٍ وقف حول قبره كبّر وهلّل=وانا بعيد آتأمّل منتظر دوري!

[ابن الخطيب]

يقول ابو محمّد لو القول ناقص=افضل ولا بعض الكلام المهذرا
قيل العذارى كلّهم بالمراقص=وانا اتحدّى كان فيذاك عذرا

[ابن الخطيب]

ولد الخال:

ودّي اوجّه شكر للاتصالات=حيث ان ما عنده بشغله تحيّز
الى لقت مثلك وشرواك بالذات=رقمٍ مميّز للعميل المميّز

علي الخطيب:

حيّاك يا مرسل بيوتٍ جزيلات=كنّك سفاره والاوادم تفيّز
من عقب صوتك ما نبي بعض الاصوات=يوم ان صوتك هو اساس التميّز

[ابن الخطيب]

لولا ( الحيا ) .. ما للعيون التغضّي=لي ( نفس أمّاره ) ولي ( قلب سوّام)
تعبت من قولة : ( يالاسنان عضّي )=داخل على ( السبّابه ) ان راح الابهام
لانّي ... من السوق البعيد مْتقضّي=وغيري ... يدوّر سلعته وسط الاحلام
قم يا ( حمد ) بالناس .. لا طاح حظّي=يا نعنبوه الحظّ .. ( لا طاح ما قام )
انا ( الحميدي ) وانت ( علْي المفضّي )=لو يكثر بوسط الــ ( مدارات ) الاقلام
ما كل من ( صلّى ) وراك ( مْتوضّي )=بعض العرب يركع .. ولا يْعرف الاسلام

[ابن الخطيب]

ليت يا كبتن تشوف اللي ما اظنّك شايف=جرحي اللي بخاطري ما عالجته اللزقه
الوكاد انّك على ذا الحال ما انت بْكايف=لو يقول الناس بالاسباب تقطع رزقه
آه لو تدري يا كبتن وش تجيب الطايف=جابت الحجّاج والبرشومي وذا البزقه
من سمعت ان قلعته والهبيّل خايف=كن روحه واقفه في حنجره منعزقه
مير صار يدوّر الشرهه ورى بن نايف=حاسد نفوس الخلايق بالخفا منرزقه
والمصيبة يدعمه معيوف مثل العايف=مبتلش به والحقيقه فكّه من الخزقه
ليت يا كبتن تشوته في شهار الطايف=صرت احسّ انّه على الكرسي ملزّق لزقه

[ابن الخطيب]

يهمّك الشعر ولا همّك اللهجه؟=العنصريّه تبي تذبحك يالمنجي!
صحيح ما اقدر اغيّر درب منتهجه=انا لساني حجازي بسّ قصمنجي
شاعر واغنّي لحالي وازرع البهجه=في وجيه تقل انّها محقونةٍ بنجي
ادوّر اللي يزيد الرجل في وهجه=رح علّم اللي تمنّى طارة الرنجي
ولا انت ودّك تعكّر ليلة المُهجه=طبعك دني! والأَمرّ اسلوبك اسفنجي
الله يرحمك يا بوي الذي نهجه=لا يمكن يفرّق الابيض من الزنجي!!

[ابن الخطيب]

مسيرة البادي اللي انت قايدها=رفرف علمها على عنيزه وكلّ اهلك
قل للهنوف البنات اليوم تحسدها=ورح قول يا ريم لا بعدك ولا قبلك
يا حظّ منهي فنيت العمر والدها=حتّى تقلّط رجاجيلٍ مع المملك
وتشوف كل بنت مع رجّال يسعدها=ماهوب واحد يعلّ كبودهن مثلك

[علي الخطيب]

مع احترامي للمشاعر والاصوات=وثقافةٍ من نوع اهلاً وسهلاً
لا عاد تطرون الخيانة بالابيات=يا جيل ما يعرف وش الحبّ اصلاً

[ابن الخطيب]

يا بنت ياللي فارقن فيك الجمال
وفيك الوصايف بالشعر متآلفه

انا رهين عيونك السود الثقال
اللي على ضيقي وحزني حالفه

منتب بشر والله قطعة من خيال
كنك مع نجوم السما متوالفه

انتي خصالك غير عن كل الخصال
ولا ردوفك .. سالفتها سالفه

[ابن الخطيب]

أثر القمر يمشي على الأرض يا سعود
ما عاده اللي تلمحه في سمانا

كنت أحسب انه في دجى الليل محدود
لكن طلع بالنور يضحك معانا