البارحة ذكّيت قلبي وضحّيت=بالروح , كله في سبيل الكرامه
قلبي توطّيته برجلي وناديت:=كل الجروح تطيب غير الكرامه
أنا عزيز وعزّتي به تعدّيت=ذل المواقف لاجل عز الكرامه!
من خلقتي أمشي على صافي الصيت=والصيت ما يصفى بذل الكرامه
شرعت لي منهج قديم وسنيت:=كلش يهون ولا تهان الكرامه
بدين الكرامه نلت مجدي وعزّيت=والمجد ينال بعز دين الكرامه
كرامتي والروح شطرين في بيت=وتروح روحي لو تروح الكرامه!
ياصاحبي مسموح مهما تجرّيت=عليّ , بس اصحا تمس الكرامه!
ترى الكرامه ثروتي حي أو ميت=خذ ثروتي والروح وخل الكرامه
من يهتني بالمال فانا تهنّيت=بمواصلة روحي بروح الكرامه
ومن يعتزي بأصله فأنا اللي تعزويت=بأم الأصول الخالدات الكرامه
ماهو قصور في تميم العناتيت=أصلا تميم المجد أم الكرامه!
والله من خل تركته وخليت=صداقته ورضاه لاجل الكرامه
لا ياحبيب الروح ! اعذرني سلّيت= من روحكم روحي ومعها الكرامه
أبنسحب..! يومك غلطت وتعديت=وذبحت روحي مع وريد الكرامه!
وأقول سامحني إلى رحت واقفيت=روحي وبعته! واشتريت الكرامه!!
العرض العادي
