البارحه مابين انـا نيـم وِمْفِيـقْ=بأولى المراحل دوب جفني يغفّـى
بأول ثلاث من الدقايـق تخافيـق=قبل السُبَات وقبل نفسـي توفّـى
أقبلت لي مثل الفرَج حزّة الضيـق=وفزّيت أحيـي طلّتـك واتحفّـى
كن القمر داخل مع الشيش وِمْوِيقْ=في ركني اللي توّ نـوره مطفّـى
العطر ديبـونٍ مروقْـكْ ترويـق=من نشوته مَشْيِـكْ يكـاد ايتكفّـا
فوقك حريرٍ تُوبْ مالـه معاليـق=مْعَلَـقٍ فـي زَمْتِينـكْ وكـفّـى
أحمر بلون الدّم الاحمر إلى رِيِـقْ=قاني كمـا الياقـوت لافِفْـكْ لفّـا
مْنَسّقٍ فـوق التّفاصيـل تَنْسيـق=شي امهظومٍ منـك شـيٍ معفّـى
وِاحْتِرْت أبي مجلس يناسبك وِيلِيقْ=كل المجالس دون قـدرك تخفّـى
ولا دريت إلا ضلوعـي مِفَاهِيـقْ=عن الحجاب وقـام قلبـي يرفّـا
يماتِل المعلـوق مَتْـلْ المسابيـق=يِبِيكْ تدخل فـي حشـاه وتدفّـى
وارخيت شِيفونِكْ ودنّقـت تدنيـق=وطبَعتْ لي نشّـة شفايـاً تشفّـى
وانعشْتني وارويت حبل المعاليـق=من بعد ماطالـت عِجافـه وجفّـا
الله ما الذّكْ وما احْلاك من ريـق=كن العسل بين الشفايـا مصفّـى
ليا بعد مـن لطّخَـنّ المساحيـق=يَبِنْ يِخَفِـنْ شـي مـا يِنْتَخَفّـى
حلاك ربّانـي وملحـك شباريـق=الله تِجَـزّل بِـكْ وكفّـى ووفّـى
ذوّيقةٍ جت ساريـه عنـد ذوّيـق=بلاش إساءة ظن .. طيفٍ وقفّـى
العرض العادي
