مرثية الشبل لمساعد الصيخان

[روح التميمي]

هذه مرثية للشاعر عبدالرحمن الشبل في المرحوم مساعد الصيخان

آمنت بالفرد الصمد والتجي له=وان البنادم تقتفيه المنيه
ياعنك فرقا اللي ضرا للجزيله=بالقلب مثل السيف وقعه عليه
البارحه يادحيم ماهيب ليله=ماغير اسجم بين هذي وذيه
وامن البكا عيني تزايد هميله=موجس بقلبي شذرة النافعيه
ماكني الا فوق حام المليله=تفوح كبدي فوحة الشاذليه
وامن العنا ماغير اعد الطويله=اطوح الونات روحه وجيه
وجدي وجود اللي تزايد غليله=دارت رحا الهيجا عليه اضحويه
ثار العسام ولعت بالفتيله= طلابة(ن)للثار والنار حيه
يبي يسوي سواة لعيون هيله=وكلن تعزوا فوق ظهر العبيه
وصارت عليه وضيع الله دليله=طاح ابمحله مدميات شفيه
ماهيب حاله حالته يرثي له=ضامي جريح وفوقه القوم ميه
عليه دارو بالسيوف الصقيله=كلن يحد النظره الانكريه
يبي نجاته وانها مستحيله=خلوه ربعه بنكسار السريه
وجاه ابلج (ن)ماغير ينفث سبيله=عليه سل السيف هاك البليه
وبضربة(ن)سنعه وراسه تشيله= وخلي عشا للذيب بالجرهديه
عليك ياشوق الهنوف الاصيله=ابكي وعيني من بكاها شقيه
عليك ياللي نافل(ن) كل جيله=عندي ليا صعبت علي القضيه
عذب النبا نبع الصخا والفضيله=ريف الضعيف اللي حواله رديه
نفسه مضريها لكسب النفيله=عد الروا مرو الكبود الضميه
سمح المحيا والمبادي نبيله=تالي وحتى سنينه الاوليه
ويابعدها بعداه عنه الرذيله=ماهومن اللي ذمته عامريه
اللي ضرا للطيبه وتحصيله=نور(ن)يشع بليلة خرمسيه
وامن السنع بالراي يفلج قبيله= على النقا ماهوب دجل وزريه
على الخوي الاشاف بالعلم ميله= ماعنده الا الهرجه الصامليه
عزالله اني فاقد(ن) لي قبيله=ضاقت بي الحيله على كل نيه
ساعة على قبره تحط النصيله=سالت دموعي لين بلت يديه
نفسي عقب فرقا مساعد عليله=حيثه بقلبي له فياض(ن) عذيه
فرقا الخوي اللي بحملي اجي له=عليه اثقل من طويق وطميه
زادي على كبدي كما الحنظليله=من هاالمصيبه مالها قابليه
ابا تصبر مير مامن وسيله=يادحيم موجسها على القلب كيه
يعرض عليه كل لحظه واخيله=متذكرن وقت(ن) مضاله وليه
حيث ان له بالقلب صوره جميله=قمة غلا بين الخوي وخويه
وانا ادري ان الموت مافيه حيله=حقاً يبي يلحق جميع البريه
مؤمن ودنيا العبد ماتستوي له=تدرج رحاها والليالي خفيه
والحمد للي مايخيب دخيله=ولله يانفس الرضي الزكيه
ال جنة الفردوس ظل(ن) ظليله=تعطى كتابك باليمين النقيه
الله يعطر قبر ريف الهزيله= وتسقي ثراه المزنه العقربيه
واللي مثل عذب النبا يندعي له= ابرحمة الله وبشفاعة نبيه
وعلى فراق الذرب واف الحصيله=عزيلكم يالعزوه الخالديه
وانا على اللي ساق نو المخيله= رب(ن) محا عاد ابرياح(ن)عتيه
رب(ن) من النيران نجا خليله=صارت سلام وبرد بامره وفيه
ادخل على اللي لااله(ن) بديله=والعبد بالدنيا بدبرة وليه
وحقه علي امن الدعاء دعوتي له=وابشركه في كل عام ابضحيه
ومثله بقافي والمراثي يبي له=من شانه احفي من رثاه المطيه
يقوله اللي هاالنبا هد حيله= يالله يامعبود رحماك فيه
وانا رثيت اللي ضرا للجزيله= باللي ذكرت وللمراثي بقيه

15/2/2007