مامن ورى العيلات غير الخرابي

[روح التميمي]

قال روح التميمي بعد ظهور نتائج الانتخابات البلدية الأولى , كتب الشاعر

حاتم الحريّص المطيري قصيدة , تعبر عن امتعاضه من تلك النتائج , وفيها تلميحات مؤذية , و إشارات جاهلية !

ويبدو أنه قالها على سبيل الفكاهة والمداعبة , ولم يعلم ما تضمنته من ألغام طائفية

تؤجج المشاعر , وتعيد رعاع المجتمع إلى إعادة التعصب والتعنصر القبلي , وتحيي عداوة

ماتت غير مأسوف عليها بين البادية والحاضرة .. قالها فأغضبت الجميع وعلى رأسهم عقلاء جماعته وقبيلته

فانبرى له عدد من شعراء عنيزة الحضر يردون عليه , ولعل أقوى قصيدة رد على قصيدة حاتم

هي قصيدة أبو عزيّز شاعرنا حمد البادي .. المنقولة أدناه من تعليق لزميلنا النشط A-8

ويلاحظ على قصيدة حمد أمران : التعقل والقوة .. المهم أن القصة كلها ماتت ـ ولله الحمد ـ في حينها

وأصبحت في ذمة التاريخ .. ويبدو أن حاتم ندم على قصيدته , لأنه أدرك حجم الكارثة التي ستنتج عنها

لو لم يتدخل عقلاء القبيلة العربية الشاهقة مطير ,ويستنكروا ما ورد في محتواها ..

ومما يجدر ذكره هنا هو أن حمد البادي وحاتم المطيري الآن صديقان بينهما مودة وألفة ..

وحتى لا نُرمى بإعادة الأحداث المقيتة أحب أن أذكّر أننا هنا نقوم بدور التوثيق , والتوثيق يعتمد

في الأساس على التاريخ بخيره وشره , وحلوه ومرّه .. ولا شك أن تلك القصة لم تكن كلها شرا ..

بل كان فيها خير كثير , وهو العبرة التي تجلت واضحة لكل ذي نظر سليم من عدم جدوى

إثارة النعرات والحزازات القبلية وغير القبلية .. وأن المجتمع ملك للجميع ..

وحتى تتضح الصورة جيدا .. هذه أولا قصيدة حاتم أولا .. يقول :

الحضر هجّوا بالصناديق بالليل=باسم الغرير والرجب والنهابي
ويضا الصريخ بنسبة حطم الكيل=ولا منهم اللي في هاك الليل غابي
حطو لهم وسط المراكز مراسيل=وتغنموا شيبانها والشبابي
مساعد تعلق ما دروا عنه فالليل=يوم أصبحوا كنه وراهم ارهابي
قالوا هذا خله عن القول والقيل=وعن السؤال اللي يبيله جوابي
وبرضه ماهو راعي خلافات وحليل=وأبو محمد فالامورانسيابي
والبدو خلوها صفوف ومواويل=ولا حسّبوا للي وراهم حسابي
ماغير شبوا بالمفاريد والحيل=والرزق عند اللي ينشي السحابي
وراجت علي اللي يشربون الفناجيل=اهل المهار مطوعين الصعابي
زحول الرجال القالطين الحلاحيل=رجالهم يوم اللقا ما يهابي
ولو انها بالشلف ومصافق الخيل= ما طاح قدم انحورهم للذهابي
ولكن هذا وقت يروّعك ويهيل= ولا أحد تكلم فالخطا والصوابي
وابن رشيد يدور ويحط ويشيل= يشيلون اوراقهم فالمخابي
من ضلع ابان ولا يدلون بالحيل=يدورون المركز الانتخابي
معلا مبارك مير مامن محاصيل=وضاعت نتايجهم بعكس الاجابي
والله يعوضها لهم فالمقابيل =ولا السنه هذي صفت للنهابي

* * *

المشاركة الأصلية كتبت بواسطة A-8

وهذه قصيدة الشاعر : حمد بن عبالعزيز البادي ردا على ( حاتم الحريّص المطيري )


قصيدة / حمد بن عبالعزيز البادي , ردّا على قصيدة حاتم بن محماس المطيري على إثر نتائج الانتخابات البلدية في محافظة عنيزة .

يالله جنّبنا عن الحيف والمـيــل=بهداك تهدينا الطريق الصوابي
سمعت من حاتم لحون وتماثيل=وانكر لحنها خاطري واسترابي
يبي يثــوّر جاهـليّة هــل الفـيــل=والجاهليه وقتها انحــى وغابي
انتم وحنا كننا الجـدي وسهـيـل=نجمين بين البعــــد والاقـتـرابي
مكـمـلـيـن لبـعـضـنـا كـل تكميل=إخوان ديــن ولا خلطــنا كتـابـي
إن طعتني ياحاتم ابعـدعن العـيل=مامن ورى العيلات غير الخرابي
جدّك وابوك من الرجال المشاكيل=ماودي انك بينهم بَـتّ نــــابــــي
جيراننا يوم السنين المعـاضـيــل=والنعم في جيرة عــــزاز الجنابـي
عندي علوم وفي خيالي مواويــل=لولاي احسّــب للرجال الحسابــي
ماودّي ازعل راس محماس وشعيل=وماني مخيّب هقوة اللي هـقا بــي
حـنّا رجال ولاعليـنـا مـداخـيـــــل=نعمٍ بنا غـصبٍ على كــل هـابــي
نحمي مواقـفـنا ولو طــاول الطيل=تـعـلـّم التــاريخ واقــر الكتـابــي
ماجيت غازي جيتنا ضيف ومحيل=طيرٍ مهاجر واصبح الطـير رابـي
لقـا الكرامـه والغروس المظاليل=واستاطـنت رجليه عـقـب العذابي
واليوم يجـزانا جزايا المهـازيـل=ماينقـل الهزلات غـيـر امتحــابـي
واسلم وقبّل راس محماس تقبيل=وقل له هذي شرهـاتـنـا والعتابي
واستخبره ينبيك شرح التفاصيل=ولاتضـيع بطـرد لـمع الســرابــي

حمد بن عبدالعزيز البادي- 20/4/1424هـ

* * *

وللفائدة نورد قصيدة أخرى كتبها مجاراة لقصيدة حمد البادي ,

الشاعر صالح عبد الكريم المرزوقي .. يقول :

يالله ياوالي عليك التساهيل=عطفك ولطفك ياجزيل الثوابي
جانا جواب اللي يصوغ التماثيل=من عادته بدع اللحون العذابي
قريت ماجا في جوابه بتفصيل=يوم إجرهد الليل والكيف طابي
لو كان مايحتاج شرح ٍ وتحليل=القصد واضح في ثنايا الجوابي
يمدح هل الطولات والبن والهيل=أهل المكارم متعبين الركابي
اللي لهم في منبر المجد تمثيل=عز الصديق وللعدو سم نابي
وإن جا نهار وطوحن الهلاهيل=وطار الغطا عن ناقشات الخضابي
وصاح الصياح وركبوا الجيش والخيل=الكل منهم باللقا مايهابي
وصار الدخن بالجو مثل المخايـيل=ورصاصها يشبه لوبل السحابي
تلقى الجنايز نصفها مابعد شيل=والطير يفرس بالظهر والعلابي
إيضا لهم تاريخ في صفحة عقيل=شيبانهم واللي بسن الشبابي
يسرون بالغدرا سواة الجماميل=إلى غفا في مرقده كل هابي
مايطمعون بحملة ٍ تالي الليل=ولاقيل يوم ٍ فتشوا بالزهابي
شدوا ومدوا من على كـنــّـس ٍ حيل=وأقـفن كما الضلعان عوج الركابي
فج النحور مقربات المناهيل=بتر الفخوذ مذللات الصعابي
تومي بهم بين السهل والغراميل=من تطلع البيضا لما إنه تغابي
من شط دجله لين يافا إلى النيل=ومن قوز غزه لين دار الشهابي
يشهد شعاع الشمس والجدي وسهيل=وتشهد عدود ٍ بالسهل والهضابي
يابو عزيز وأنت قرم ٍ وحلحيل=قولك تميز بالشره والعتابي
شره ٍ على اللي همه القال والقيل=قول ٍ سعى بين العرب بالخرابي
هذا ترى مثل اللذي فاته الريل=متوهم ٍ يتبع لميع السرابي
وإلا ترى فيهم رجال ٍ مشاكيل=يميزون المخطيه والصوابي
أصحابنا بالعسر والعدل والميل=عدوهم ماذاق حلو الشرابي
فزعاتهم معروفة ٍ بأول الجيل=وفعولهم مذكورة ٍ بالكتابي
والشمس ماغطي سناها بغربيل=ولا يرد السيل سمل الثيابي