[روح التميمي]

هذه القصيدة في رثاء صاحب السمو الملكي الأمير عبدالرحمن بي سعود بن عبدالعزيز آل سعود رحمه الله:

هذي هي الدنيا مِنَ آدم إلى الصُّور=ما يِسْتِمِر لْكِل حَيٍّ مسيره
في غَمْرة الأفراح والبال مسرور=والنفس تَلْهِى بالحياة المثيره
حَلَّ القضا وِكْتاب الارواح منشور=وِخْتَار أبو خالد ولَوَََّح بشيره
يوم الخميس الصبح مع شَعِّةَ النور=فِجيِعةٍ لاهْلَ القلوب الكبيره
طار الخبر بالجو ما هوب محصور=ثانِي عَشَر بِجْماد ثاني مطيره
اربع مِيِه عِقْب الف ما قلتها زُور=في عامنا خمسة وعشرين سيره
أقول للتَّاريخ والقلب مكسور=فقيدنا بالعصر شُعْله منيره
ابن سعود بْكِل الاوطان مشهور=مثل العَلَم يَبْرق بنُور البصيره
له سيرة يِدْرَس بها كل ماثور=يَذْرِف نداها من صفّاوة ضميره
رمز الرياضة عندنا وَافِيَ الشور=حُبَّ الوطن عنده عَمَار السريره
نفسه عزيزه تكره الظلم والجور=ومْنَ المحبه له فضايل وِفِيره
للنصر حِرْزٍ عن عَبَث كل ماجور=قلبه مع الجمهور في كل ديره
عند التِّعِصِّب يِنْسِحِب باوَّل الدُّور=ان شاف حالات التِّعِصِّب خطيره
تِلْهِب تصاريحه صحايف ومنظور=يشوف علم ما تِبَيَّن لِغيره
باب الصِّراحه منهجه غِيب واحْضُور=اصْفَى من العَذْب المنَقَّى غديره
من موقفِه كُوم البطولات منثور=عند الزِّعيم او بَالحماسه يِديِره
عند اخْتِلاف الرأي ما فيه محذور=نِتَايِجِه بِمْناَقش الرأي خيره
لا شك ما له عن ذَرَا الحق دستور=الخير فاله والتَّواضع وِزِيره
ان ما نطَقْت بْحَق ما نيب معذور=اعَزِّيَ الاسْرِه عسى الله يجيره
والتَّعْزِيَه للنصر ادَاره وجُمْهُور=في كل جانب من حدود الجزيره
الله يقدِّم له من الخير مذخور=بالقَبْر وبْوَقْت الفزع ما يِذيِره
صلاة ربي مع سلامه على الفور=على نِبِيِّ له مواقف شهيره

13/6/1425هـ