[روح التميمي]

يا سلوة الخاطر ويامنعش الجاش=يانفحة العنبر على القلب مرشوش
يا مروي عروقِ نشانيش وعطاش=يا جنة الدنيا بها الظل معروش
أسقيتني عذب الهوى خمر بغراش=وشيّدت لي بالقلب سلطان وعروش
لما غديت من الطرب تقل حشّاش=وإلا مهبولٍ مخلف العقل مخروش
وبلحظة جنونك ثقيل العقل طاش=وضيّعت فيها زهرة الحب بلُّوش
لوا حسايف كنت للخاطر إنعاش=واليوم سقت الحب للموت منعوش
إلى ذكرت اللي مضي جاني رعاش=معقول كان الحب والشوق مغشوش !
أيامنا الحلوة مضت مثل الارماش=لا شك داشتنا صروف الهوى دوش
شربتني علقم وأدمنتك إجهاش=وما بينهن راحت حياتك على بوش
عرفتن الواضح وطالعتك غباش=غيمٍ تراكم بين نظرات ورموش
نقطة سوادٍ خربت لمعة الشاش=وأمسى بها عذب المشاعر به خدوش
فيما مضى زين الحكي كان ببلاش=وهالحين مع طول الزمن صار بقروش
طويت حبلي من حياتك على ماش=ما دام دربك صار بالشوك مفروش