اعزائي ...
هي كيبوردية قديمة نوعاً ما ...
حبيسة ادراجي منذ ذلك الوقت ...
كان لها مناسبة معيّنة ... وانتهت !
اتمنى ان تحوز على القليل من رضاكم ...
.
.
.
يقول :
يا مرحبا ترحيبةٍ عد الرمل عد الشجر=وعد اللي ما تاصل لآخرته ولا تاصل مداه
ان كان ذا شعرك فانا من اللي قريته منبهر=وان كان لا حي الله المرسال لو كانت حصاه
يا صاحبي كم لي وانا اعد الليالي وانتظر=واقول يا عل الغياب اللي خذاني ما خذاه
مير القصيدة خلّت الاحساس يلعب بالفكر=كلما قريت من القصيدة بيت جاوبته بـ آه
خذني على مودك ولكن خاب اللي ما استشر=وان كنت اثقّل في كلامي ماحدٍ غيرك قراه
المسلم اليا من خطا بمسلم يدوّر له عذر=وان ما لقى قال انه معذورٍ بعذرٍ ما لقاه
ما ذقت انا في هالحياة المر وذقت اللي امر=واتصبّر بقولة يا زينه يا طعامه يا حلاه
ربّك خلق فينا العيوب وخالقٍ فينا الستر=والحمد لله يوم ثوب الستر كلٍ اكتساه
لا تحسب المظلوم عايش في حياته منقهر=ما دام له دعوة مجابه وربّ يسمع له نداه
قصّة نبي الله نوح بمركبه من الدرر=تكابر عياله على ابوهم ولا راحوا وراه؟
وقصّة نبي الله موسى كانت اشبه بالسحر=المعجزة ايده وحيّة كانت اصلا هي عصاه
وقصّة نبي الله يوسف في اميرة في مصر=همّت به وقدّت قميصه والسجن اللي بغاه
قصص من اعظم ما سمعته وامتثل به واعتبر=واعطيك انا قصّة تخلّي من سمعها قال : هاااااه!
في وقت غير الوقت هذا او صور غير الصور=كانوا رفاقة يحكي واحد وان حكى الثاني صداه
عاشوا على حلو الحياة ومرّها من الصغر=وتعلّموا كيف الصلاة والصوم وايتاء الزكاه
لو واحدٍ منهم يفكّر كيف يقطف له ثمر=وكوّش عليه الثاني قال الاولّي والله فداه
وسبحان ربّك فرّقتهم ليلةٍ مابه قمر=واحد جفا والثاني ما يدري رفيقه ليه جفاه؟
ومن بعد ما عادوا وراح الحزن والهم اندثر=الثاني مسامح والاول لا يبرّر عن خطاه
عشق الرجال اسمى وفيه من الطهاره والذخر=لان المواقف تنبنى ومشهودةٍ للي بناه
يا صاحبي خل عنك والله من غيابك منكسر=ومن رجعتك صرخت صرخة هزّت جبال السراه
والصاحب اللي ما يجي من صحبته غير الفقر=ادعي له الله يهداه ادعي له الله يهداه
والصبر ماله طعم لكنّه يعالج بالذكر=والبحر ياكم فرّق الطفل الصغيّر عن اباه
والعاصفة مثل الحزون اللي تشيلك من حدر=ثم ترفعك ثم ترجع لأرضٍ وتدفنك بخلاه
والموت بعده جنّة او ممكن يجي بعده سقر=وابن آدم محاسب بلا ريبه على عمرٍ فناه
سقاك ربّي غيمته وياعل تسقى من نهر=من كاس حورٍ من كثرهم ما تلاحظ من ملاه!!
مقبول عذرك والخطا في نظرتي مهما كبر=عادي لانه من رفيقٍ ما درى وشهو غلاه؟
ان كنت تهديني العمر فانا حياتي ما تسر=ليه اظلم حظوظك معي خل الشقا للي شقاه
انا الاديب الشاعر اللي لا تفكّر وابتكر=واعطاك بيتٍ لو يقوله عند غيرك اشتراه
يا صاحبي وانا الحجر بس لا تظنّه انكسر=من كثرة رماحٍ تصيبه صار شطبٍ في قفاه
وسلامتكم ..
اخوكم علي ...
.
.
.
.