محاورة بين الشاعر بن حسن والشاعر محمد القويماني
القويماني
يامرحبا ياشاعر عنيزة بعد حليت ضيـف=في منتدى القمة ومحسوب على شعارها
بيني وبينك سالفة ياصاحب القلب النظيف=واللي يعرف اسرار ربعه مايبيح اسرارها
بن حسن
دام البقاء بك عد من بالصيف راحوا للمصيف=والله يبارك في رجـال (ن) جمعتنـا دارهـا
سويت مشكل بالرياض وزعلّت راعي عفيف=لين انتشر هالعلم بين اصغارهـا وكبارهـا
القويماني
الليل يامحمد تراك مكلف في امـر كليـف=اتعب قدم رجلك عسى التوفيق في مشوارها
حنا رجال مادخلنا خوف فالوقت المخيـف=نمشي عدال ولانـروح يمينهـا ويسارهـا
بن حسن
كان الكلافه لأجلكم والله فلا اعوّد معيف=لو هي تحت غبة بحر جبنا لكم محارهـا
ماني مرديّكم لكن الوقت فيه شتاء وصيف=اخاف من ساعة غضب فيها يثور اغبارها
القويماني
انته معي مانته بضـدي ميـر لطفـك يالطيـف=مـن الحيـاة القاسيـة واقبالـهـا وادبـارهـا
لاصرت جندي فاالحرس واخوك فاالشرطة عريف=وقـف علـى بـاب الحراميـة ودور جـارهـا
بن حسن
هذاك تدري يا محمـد بالثقيـل وبالخفيـف=ولا تقرب للعلوم اللـي تعـرف اضرارهـا
ان كان حدوك المرور توقف بجنب الرصيف=اصحا تقول الناس مما قلت لك وش كارهـا
القويماني
حرب الرغامة ياالتميمي قبلها حرب الصريف=لكن مـن كثـر الجنايـز ماتعـب قبارهـا
ياكثر ناس ودها تفرق وليـف مـن وليـف=حسبي على من حرك الفتنـة وولـع نارهـا
بن حسن
يا كثر قومٍ قد غزت لكنها ترجـع نكيـف=اما خذيت اجمالها والا خذيـت اديارهـا
غديت مثل السني اللي ساكنٍ وسط القطيف=تلقى جميع الناس من يمه تلـد انظارهـا
القويماني
اللي معه بندق يبا يقضي على اللي معه سيف=لاصـار بنـدق طيبـة ولايهـس اعيارهـا
راح الشداد ان كان حول عنه من حظ الرديف=والغبن يمسي فاالعيون اللي تهـل اعبارهـا
بن حسن
يمكنها تكّذب ويصبح راعيه مثل الكفيـف=لما انها تِذبح خلوج القوم قبـل احوارهـا
مادمت في وسط البلد مالك رفيق ولا حليف=تصبح سواة الاسهم اللي ماتزيد اسعارهـا
القويماني
انته تعرف اشعاب مكة والشريف ابن الشريف=ليتك لحقت قريـش حتـى تذبحـك كفارهـا
الصيف هذا صيف بباريس والا فـي جنيـف=احجز على الطيارة اللـي ماهـر طيارهـا
بن حسن
حنا بلشنا في خلف يوم استرحنا من خليـف=والخيل في وقت السبق ما يختلف مضمارها
ولكن على ماقيل يدرى بالغني وبالضعيـف=والمملكة ماتقفـل البيبـان للـي زارهـا