[روح التميمي]

هذه معارضة لقصيدة

الأستاذ عبدالعزيز القاضي المنشورة سابقا هنا بعنوان ( باريس نجد)

كتبها أبو منصور تجاوبا مع قصيدة أبي إياس .. وطلب عدم ذكر اسمه ..

قال أبو منصور في تقديمه للقصيدة :

"أوجه هذه القصيدة إلى الشاعر عبدالعزيز بن حمد القاضي , ردا على قصيدته في عنيزة

وقد أبدع الشاعر في وصفه للأجواء الفسيحة والعادات السائدة , والذكريات الطيبة والأماكن المرتادة

أما أنا فقد تحدثت عن ماضي عنيزة السابق وشجاعة أهلها , وما تعانيه الآن من تغير في الأوضاع

اختلاف في العادات , ودعوت الله أن يعيد عليها مجدها السابق, وعصرها الذهبي .."

هيّضتني وأشعلت نار المقابيس=وادعيت قلبي مولعٍ فيه مله

ويلاه من قلبٍ شوته المحاميس=غيضه يزيد وتايه الراي عله

على عنيزة صفوة الطيب ما ديس=ولا ذكرها بالردىساكنٍ له

رجالها عند الملاقى متاريس=عدوهم صابه مخافة وذلة

دايم على العدوان نار مقابيس=وإلا الصديق بجودهم تستظله

ما سلموا يوم الملاقى فواعيس=ومن بينهم دم المعادي غذًا له

ما هوب مثل اليوم جاله فسافيس=اكبار الأنفس ما بهم من تجله

الله عسى بعد الكدر والنواكيس=نفرح وكلٍّ يهتني في محله

يرجع لها عصرٍ زهى بالمجاليس=وبرايهم يرجع لنا الطيب كله

هذي مناتي والأماني تحاسيس=لعل منها صادق الخير جله

ذكرت في شعرك طوال الطعاميس=منها المصفر والغضا زان ظله

كنك بوصفك تنتقي لك معاريس=عينك على زين المهاري جبلّه

أنتَ بوصفك ملهيات الموانيس=وأنا بوصفي للوطن مرتجٍ له

وقت مضى يوم الزعامة مراويس=من بينهم تلقى السوالف مطله

سكانها عند الملاقى فواريس=دايم على العدوان سيفه تسله

يوم المعادي ناصبٍ له جواسيس=ترجّلت صوب المعادي تذله

الله عسى بعد الكدر والنواحيس=نشوف وقتٍ ما يجي فيه خله

آمين يا مجري الفلك والنواميس=وبقدرتك ندرى الخطر والمذله

وزيادة في الفائدة هذه قصيدة أبي إياس التي عارضها أبو منصور :

فل الحجاج بزود لا جيت باريس=باريس نجدْ حْجاج روحك تفله

بعنيزة الفيحا تموت الهواجيس=وتصير به نفس الشقي مسفهله

ومفارق الفيحا يجيب العواميس=ويرّث بقلبي ألف عله وعله

تسوى (جنيف) و(كان)و(لندن) على (نيس)=وتسوى بلاد الغرب والشرق كله

لاهل الثقافة عاصمة مثل باريس=نجد السما وهي القمر به مطله

ياماحلا جوّه وذيك النسانيس=بين النخل وغروسها المستظله

ويا ماحلا القعدة بروس الطعاميس=وسط المصفر بين ربعٍ ودله

وياما حلا وديانها والتضاريس=وياماحلا شمسه وبرده وظله

أحبها حبٍّ تعدّى المقاييس=وأفخر بذكره وأهتويها وأجلّه

ريحة عنيزة تستفزّ الأحاسيس=وقلبي عليها ذايبٍ به مولّه

وإن غبت عن وعيي وجتني هلاويس=فاطْروا لي عنيزة وشوفوا محله

بعنيزة عنيزة تشوف النواميس=لو مِلّت ديار العرب ما نمله

دار الكرم والمجد من غير تلبيس=فخر القصيم ونجد روحي فدى له

دونه رجال بالملاقى ملابيس=أرواحهم لعيونها يرخصن له

من فعلهم ليل المعادي كوابيس=وإن شافهم بالعين بطنه يهله

هذي عنيزة ساست المجد تسييس=وعز التمدن .. والحضارة يدله

هذي عنيزة دار دحّارة إبليس=يالله عسى الوسمي بخيره يعله

صح لسان أبو منصور وصح لسان أبو إياس ..وللجميع تحياتي